२०८३ मंसिर ५, शनिबार Saturday, November 21, 2026
खबर

‘मृत्युको मुखबाट फर्कियौँ, जेनजीले नै बचाए’ : शेरबहादुर देउवा

‘कहिलेकाहीँ मर्न काल आउनुपर्ने रहेछ । जेनजीहरूले मलाई बचाएका हुन् । फोटोमा देखिन्छ, ती बच्चाहरूले मलाई बचाएका हुन्,’ उनले भने, ‘तर जेनजीको नाममा ५० वर्षमाथिका व्यक्तिहरूले लाठो ल्याएर पिटेका हुन्, ढुंगा हाने । त्यसमा ठूलो षड्यन्त्र थियो ।’

पोखरा । नेपाली कांग्रेसका पूर्वसभापति शेरबहादुर देउवाले जेनजी आन्दोलनका क्रममा आफू र पत्नी डा. आरजु राणा देउवा मृत्युको मुखबाट फर्किएको बताएका छन् । आफूहरूमाथि भएको सांघातिक आक्रमणका क्रममा जेनजी युवाहरूले नै ज्यान जोगाउन सहयोग गरेको उनको भनाइ छ ।

शनिबार पोखरामा आयोजित आफू पक्षीय नेपाली कांग्रेसको गण्डकी प्रदेशस्तरीय दोस्रो अधिवेशनलाई सम्बोधन गर्दै देउवाले आन्दोलनका क्रममा आफूहरूमाथि भएको आक्रमण र उद्धारको घटनाबारे खुलासा गरेका हुन् ।

उनले आफू र पत्नी आरजुमाथि कुटपिट हुँदा गम्भीर चोट लागेको र अहिले पनि शरीरमा घाउ रहेको बताए । जेनजी आन्दोलनका क्रममा जेनजी युवाहरूले आफूलाई बचाएको तर आन्दोलनको नाममा अन्य व्यक्तिहरूले लाठो र ढुंगामुढा गरेको उनको आरोप थियो ।

‘कहिलेकाहीँ मर्न काल आउनुपर्ने रहेछ । जेनजीहरूले मलाई बचाएका हुन् । फोटोमा देखिन्छ, ती बच्चाहरूले मलाई बचाएका हुन्,’ उनले भने, ‘तर जेनजीको नाममा ५० वर्षमाथिका व्यक्तिहरूले लाठो ल्याएर पिटेका हुन्, ढुंगा हाने । त्यसमा ठूलो षड्यन्त्र थियो ।’

देउवाका अनुसार घटनापछि नेपाली सेनाले उद्धारका लागि हेलिकोप्टर पठाएको थियो । तर, अवतरण गर्न नदिइएपछि सेनाको गाडीमार्फत आफूहरूलाई क्याम्पमा लगिएको र त्यहीँ उपचार पाएपछि ज्यान जोगिएको उनले बताए ।

‘आरजु र मलाई मारिसकेका थिए, हामी बाँचेका हौँ । अहिलेसम्म घाउ परेको छ । सेनाले हेलिकोप्टरसमेत पठाएको थियो, तर ल्यान्ड गर्न दिएनन् । पछि आर्मीले गाडी पठाएर क्याम्पमा लग्यो, त्यहीँ उपचार भएर हामी बाँचेका हौँ,’ उनले भने ।

आन्दोलनका क्रममा राजनीतिक नेताहरूका निवास तथा नेपाली कांग्रेसका पार्टी कार्यालयमा भएका आक्रमणप्रति पनि देउवाले असन्तुष्टि जनाए । तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखक र मन्त्रीसमेत रहेका व्यक्तिहरूमाथि भएको आक्रमणका अतिरिक्त कांग्रेसका दिवंगत नेताहरूसँग सम्बन्धित घर तथा आश्रममा समेत तोडफोड र आगजनी भएको उनले बताए ।

उनले बीपी कोइरालाका पिता कृष्णप्रसाद कोइरालासँग सम्बन्धित घर, गणेशमान सिंहको निवास तथा कृष्णप्रसाद भट्टराईको आश्रममा भएको आक्रमणलाई कांग्रेसविरुद्धको षड्यन्त्रका रूपमा व्याख्या गरे ।

‘ओली प्रधानमन्त्री हुनुहुन्थ्यो, मेरी श्रीमती मन्त्री थिइन्, मलाई र गृहमन्त्री रमेश लेखकलाई हान्यो ठिकै छ । कृष्णप्रसाद भट्टराईको आश्रममा किन हानेको ? बीपीको बाबुको घरमा हाने, गणेशमान सिंहको घर हाने,’ उनले भने, ‘देशभरि हाम्रो पार्टीको कार्यालयमा हानियो । यो कांग्रेसको खिलाफको षड्यन्त्र हो भन्ने बुझ्नुपर्छ ।’

यस क्रममा देउवाले आफूविरुद्ध आक्रमण गर्नुपर्ने अभिव्यक्ति दिने व्यक्तिहरूलाई समेत पार्टीको टिकट वितरण गरिएको भन्दै महामन्त्री गगन थापामाथि आरोप लगाए । आफूलाई मार्नुपर्ने र निवासमा आक्रमण गर्नुपर्ने भन्नेहरूलाई टिकट दिइएको उनको दाबी थियो ।

कांग्रेसभित्रको महाधिवेशन विवादबारे बोल्दै देउवाले विशेष महाधिवेशनको वैधानिकतामाथि प्रश्न उठाए । विशेष महाधिवेशनका लागि ४० प्रतिशत प्रतिनिधिको हस्ताक्षर आवश्यक पर्ने र त्यसको आधिकारिकता परीक्षण हुनुपर्ने उनको तर्क थियो ।

‘विशेष अधिवेशन गर्न पाइन्छ । सुवर्ण शमशेरले पनि विशेष अधिवेशन गर्नुभएको हो । तर ४० प्रतिशतले सहीछाप गर्नुपर्छ । त्यो कुरा सभापतिलाई लेखेर दिनुपर्छ । हस्ताक्षर ठीक हो कि होइन, सनाखत कसले गरेको छ ?’ उनले प्रश्न गरे ।

विशेष महाधिवेशनलाई पार्टी कब्जा गर्ने षड्यन्त्रको संज्ञा दिँदै त्यसको प्रतिवाद गर्नु आफ्नो कर्तव्य भएको देउवाले बताए । आफूले पार्टीबाट पर्याप्त अवसर र जिम्मेवारी पाइसकेको उल्लेख गर्दै अबको समय लोकतन्त्र, गणतन्त्र र राष्ट्रको हितमा समर्पित गर्ने उनको भनाइ थियो ।

‘मैले पाउनुपर्ने पाइसकेँ । मलाई केही चाहिएको छैन । पाँच पटक प्रधानमन्त्री भइसकेँ, अब देशलाई दिनुबाहेक केही छैन,’ उनले भने ।

देउवाले अब आफ्नो बाँकी समय लोकतन्त्रलाई थप मजबुत बनाउने र राष्ट्रका लागि योगदान गर्ने काममा खर्चिने प्रतिबद्धता व्यक्त गरे ।

Read more

विन्ध्यवासिनी क्याम्पसको अध्यक्षमा शोभामोहन पौडेल निर्विरोध निर्वाचित

पोखरा । पोखरा महानगरपालिका–१६, बाटुलेचौरस्थित विन्ध्यवासिनी क्याम्पसको अध्यक्षमा शिक्षासेवी शोभामोहन पौडेल निर्विरोध निर्वाचित भएका छन् । क्याम्पस सञ्चालक समितिको शनिबार सम्पन्न पाँचौं अधिवेशनले पौडेलको अध्यक्षतामा ११ सदस्यीय नयाँ…

लायन्स क्लबको पाँच दशक : सम्मान, सेवा र सामाजिक उत्तरदायित्वको स्वर्णिम यात्रा

सभामुख अर्यालको जोड : निजी क्षेत्र बलियो र सुशासन कायम नभएसम्म समृद्धि सम्भव छैन पोखरा । पाँच दशकअघि सामाजिक सेवाको उद्देश्यसहित पोखरामा सुरु भएको लायन्स अभियानले शिक्षा, स्वास्थ्य,…

लायन्स क्लब अफ पोखराको स्वर्ण महोत्सवको तयारी पूरा, सभामुख अर्याल पोखरा

पोखरा । लायन्स क्लब अफ पोखराको ५०औँ स्थापना दिवस अर्थात् स्वर्ण महोत्सवको सम्पूर्ण तयारी पूरा भएको छ । स्वर्ण महोत्सवको अवसरमा आयोजना हुने विशेष समारोहमा प्रमुख अतिथिका रूपमा…

जब विश्वास बिक्रीको साधन बन्छ

मनीष भुर्त्याल | पोखरा विश्वविद्यालय हामीमध्ये धेरैले आफूले विश्वास गर्ने व्यक्तिले कुनै सामान राम्रो छ भनेर सिफारिस गरेकै आधारमा खरिद गर्ने निर्णय गर्छौं। विशेषगरी सामाजिक सञ्जालमा लामो समयदेखि…

द्रुतमार्ग निर्माणमा अर्को उपलब्धि : महादेवटार सुरुङ छिचोलियो

काठमाडौँ । राष्ट्रिय गौरवको आयोजना काठमाडौँ–तराई/मधेश द्रुतमार्ग निर्माणमा अर्को महत्त्वपूर्ण उपलब्धि हासिल भएको छ। मकवानपुरस्थित महादेवटार सुरुङमार्गको बुधबार ‘ब्रेक थ्रु’ भएको छ। राष्ट्रपति रामचन्द्र पौडेलले एक समारोहबीच सुरुङको…

स्वास्थ्य पत्रकारिता पुरस्कारका लागि प्रतिभा छनोट समिति गठन

पोखरा । युआरएल फाउन्डेसनले स्थापना तथा सञ्चालन गर्दै आएको राष्ट्रिय स्वास्थ्य पत्रकारिता पुरस्कार प्रदान गर्न प्रतिभा छनोट समिति गठन गरेको छ । अग्रज पत्रकार केशवशरण लामिछानेको संयोजकत्वमा गठित…