
पोखरा । लायन्स क्लब अफ पोखराको ५०औँ स्थापना दिवस अर्थात् स्वर्ण महोत्सवको सम्पूर्ण तयारी पूरा भएको छ । स्वर्ण महोत्सवको अवसरमा आयोजना हुने विशेष समारोहमा प्रमुख अतिथिका रूपमा सहभागी हुन प्रतिनिधिसभाका सभामुख डोलप्रसाद अर्याल पोखरा आएका छन् ।
सभामुख अर्यालको प्रमुख आतिथ्यतामा मंसिर ५ गते पोखरा इभेन्ट सेन्टरमा स्वर्ण महोत्सव विशेष समारोह आयोजना हुनेछ । कार्यक्रममा क्लबका अग्रज, संस्थापक सदस्य, पूर्वअध्यक्ष तथा सामाजिक क्षेत्रमा विशिष्ट योगदान पुर्याएका व्यक्तित्वलाई सम्मान गरिने क्लबका पूर्वअध्यक्ष दीपेन्द्र कोइरालाले जानकारी दिए ।
स्वर्ण महोत्सवको पूर्वसन्ध्यामा शुक्रबार पोखरामा बृहत् रक्तदान कार्यक्रमसमेत आयोजना गरिएको छ । रक्तदान कार्यक्रमका संयोजक प्राडा बुद्धिबहादुर थापाका अनुसार कार्यक्रममा ५० जनाले रक्तदान गरेका छन् । निवर्तमान मल्टिपल काउन्सिल चेयरपर्सन मिलन थापालाई ब्लड ब्याग हस्तान्तरण गर्दै प्राडा थापाले कार्यक्रमको सुरुवात गरेका थिए ।
स्थापनाकालदेखि नै क्लबले शिक्षा, स्वास्थ्य, रक्तदान, वातावरण संरक्षण तथा विपद् व्यवस्थापनलगायतका क्षेत्रमा निरन्तर सामाजिक सेवा गर्दै आएको प्राडा थापाले बताए । बाढीपहिरो र भूकम्पजस्ता विपद्का समयमा समेत क्लबले सक्दो सहयोग पुर्याउँदै आएको उल्लेख गर्दै उनले आगामी दिनमा पनि सामाजिक सेवाका कार्यक्रमलाई निरन्तरता दिने प्रतिबद्धता जनाए । उनले नेपाल रेडक्रस सोसाइटीको प्राविधिक टोलीलाई सहयोगका लागि धन्यवादसमेत दिए ।
क्लबका अध्यक्ष डा. माधव तिवारीले रक्तदानको महत्त्वमाथि प्रकाश पार्दै एकपटक गरिएको रक्तदानले चार जनासम्म बिरामीको जीवन बचाउन सहयोग पुग्ने बताए । ‘विश्वमा विज्ञानले धेरै कुरा आविष्कार गरे पनि रगतको विकल्प आविष्कार गर्न सकेको छैन,’ उनले भने । उनले स्वर्ण महोत्सवलाई विगतका योगदानको समीक्षा गर्ने र नयाँ पुस्तालाई सामाजिक सेवामा प्रेरित गर्ने अवसरका रूपमा लिन सबैलाई आग्रह गरे ।
स्वर्ण महोत्सव मूल समारोह समितिका संयोजक सुशीलकुमार गोशलीका अनुसार समारोहमा पाँच दशकको सामाजिक सेवा, मानवीय सहयोग र सामुदायिक योगदानको समीक्षा गरिनेछ । क्लबका संस्थापक सदस्य, पूर्वअध्यक्ष तथा स्थापनाकालदेखि निरन्तर सेवा गर्दै आएका व्यक्तित्वलाई सम्मान गर्ने कार्यक्रम तय भएको उनले बताए । संस्थापक कोषाध्यक्षसमेत रहेका गोशलीलाई ‘लायन अफ द गोल्डेन जुब्ली अवार्ड’ बाट सम्मान गरिने भएको छ ।
समारोहमा विशेष स्वर्ण महोत्सव स्मारिकासमेत विमोचन गरिनेछ । स्मारिकामा क्लबले पाँच दशकसम्म गरेका सामाजिक सेवाका काम, उपलब्धि, ऐतिहासिक अभिलेख तथा लेखरचनालाई समेटिएको छ ।
स्वर्ण महोत्सवकै सन्दर्भ पारेर क्लबले सामाजिक सेवाका कामलाई थप अघि बढाएको छ । क्लबको आर्थिक सहयोगमा विन्ध्यवासिनी प्राकृतिक चिकित्सालयमा आरोग्य भवन निर्माण गरी हस्तान्तरण गरिएको छ । त्यस्तै, चिकित्सालयलाई आरोग्य आश्रम हस्तान्तरण गर्नुका साथै तुलसीघाटमा शवदाहस्थल शिलान्याससमेत गरिएको छ ।
सन् १९७६ नोभेम्बर १० अर्थात् विसं २०३३ सालमा स्थापना भएको लायन्स क्लब अफ पोखरा नेपालको छैटौँ लायन्स क्लब हो । तत्कालीन पश्चिमाञ्चल विकास क्षेत्रकै पहिलो लायन्स क्लबका रूपमा स्थापित यस क्लबको स्थापना अभियान लायन नवराज पटेल र उनको टोलीले अघि बढाएको थियो ।
सुरुमा पृथ्वीनारायण क्याम्पसका तत्कालीन प्रमुख तथा शिक्षासेवी जर्ज जोनलाई संस्थापक अध्यक्ष बनाउने प्रस्ताव गरिएको थियो । तर, शैक्षिक तथा प्रशासनिक जिम्मेवारीमा व्यस्त रहेकाले उनको नेतृत्वमा क्लब अघि बढ्न सकेन । त्यसपछि पोखराका व्यवसायी फणीन्द्रमान श्रेष्ठको अध्यक्षतामा क्लबको गतिविधि अघि बढाइएको थियो ।
स्थापनाकालदेखि नै शिक्षा, स्वास्थ्य र रक्तदानका क्षेत्रमा योगदान दिँदै आएको क्लबले वातावरण संरक्षण, छात्रवृत्ति, विपद् व्यवस्थापन, मानवीय सहायता तथा सामुदायिक विकासका क्षेत्रमा समेत उल्लेखनीय काम गर्दै आएको छ । पाँच दशक लामो सामाजिक सेवाको यात्रालाई स्मरण गर्दै क्लबले स्वर्ण महोत्सवमार्फत आगामी दिनमा पनि सेवामूलक गतिविधिलाई थप प्रभावकारी बनाउने लक्ष्य लिएको छ ।












