पोखरा । सम्भावित झडपलाई नियन्त्रण गर्न कास्की जिल्ला प्रशासन कार्यालयले पोखरा महानगरपालिकाको चार किमी वरिपरिको क्षेत्रमा सभा–जुलुस निषेध आदेश जारी गरेको छ।
पोखरा सडकमा उत्रिएका युवाले भ्रष्टाचारको अन्त्य गर्न, सामाजिक सञ्जाल पुनः सञ्चालन गर्न र युवा पुस्तामा नेतृत्व हस्तान्तरण गर्न माग राख्दै प्रदर्शन गरेका थिए।
प्रमुख जिल्ला अधिकारी (सिडिओ) रुद्रादेवी शर्माले सोमबार दिउँसो २ बजेदेखि अर्को आदेश नआएसम्मका लागि निषेधाज्ञा लागू हुने जानकारी दिएकी छन्। आदेशअनुसार पाँच जनाभन्दा बढी भेला, सभा, जुलुस, धर्ना तथा प्रदर्शन गर्न पूर्ण प्रतिबन्ध लगाइएको छ।
प्रशासनका अनुसार पछिल्ला दिनमा भइरहेको प्रदर्शन, जुलुस र सम्भावित हुलदङ्गाले शान्ति सुरक्षामा असर पार्न सक्ने देखिएकाले निषेधाज्ञा जारी गर्नुपरेको हो। आदेश उल्लंघन गर्ने व्यक्तिमाथि विद्यमान कानुनअनुसार कारबाही गरिने चेतावनी समेत दिइएको छ।
निषेधाज्ञा क्षेत्रका सीमाना
- पूर्वतर्फ: वाई चोक (मिलनचोकसम्म)
- पश्चिमतर्फ: फिस्टेल गेट (बेनीबास)
- उत्तरतर्फ: मालपोत कार्यालय, कास्की
- दक्षिणतर्फ: राष्ट्रिय बैंक चोक (पर्यटन बोर्ड कार्यालय अगाडिसम्म)
यससँगै पोखराको केन्द्रीय क्षेत्रमा कुनै पनि प्रकारका सभा–जुलुस वा भीडभाड नगर्न प्रशासनले सर्वसाधारणलाई आग्रह गरेको छ।
सन् १९९७ देखि २०१२ बीचमा जन्मिएका जेनजी पुस्ताको नेतृत्व र सहभागितामा भएको उक्त प्रदर्शनमा ठूलो संख्यामा विद्यार्थी र युवाको उपस्थिति रहेको थियो।
