पोखरा । पोखरामा भएको यति एअरलाइन्सको जहाज दुर्घटनामा परि दिवंगत भएकी पोखरा–२१, दोविल्ला निवासी सविना रायमाझीको अन्तेष्टी भएको छ ।
पोखरा महानगरपालिका–२१ दोविल्लास्थित निवासबाट सोमबार विहान शवयात्रा सहित दोविल्लाघाटमा अन्तेष्टी गरिएको पारिवारिक श्रोतले जानकारी दिएको छ ।
गत माघ १ गते भएको जहाज दुर्घटनामा सविनाको शव पहिचान हुन नसकेपछि माघ ३ गते डिएनए परीक्षणका लागि काठमांडौं लगिएको थियो । डिएनएको रिपोर्ट २९ गते आइतवार मात्रै आएको थियो । परिवारले शव बुझेर सोमबार नै अन्टेष्टी गरेका हुन् । सानिमाको छोरालाई अस्ट्रेलिया उडाउनका लागि काठमांडौं गएकी सविना यति एअरलाइन्सको विमानबाट पोखरा आउने क्रममा दुर्घटनामा परि मृत्यु भएको थियो ।
माघ १ गते आइतबार बिहान काठमाडौंबाट पोखराका लागि उडेको यति एयरको बिमान पोखरामा दुर्घटनाग्रस्त भएको थियो । उक्त विमानमा ४ चालक दलका सदस्य सहित ७२ जना सवार थिए ।
