पोखरा- गण्डकी प्रदेशका मुख्यमन्त्री सुरेन्द्रराज पाण्डेले प्रदेशसभाबाट विश्वासको मत लिएका छन्। बिहीबार दिउँसो बसेको प्रदेशसभा बैठकबाट उनले विश्वासको मत लिएका हुन्।
बैठकमा ५९ सांसदको उपस्थिति थियो। यीमध्ये ३५ जनाले मुख्यमन्त्री पाण्डेलाई विश्वासको मत दिए। विपक्षमा २२ मत परेको र २ जना तटस्थ बसेको सभामुख कृष्णप्रसाद धितालले घोषणा गरे।
नेपाली कांग्रेस गण्डकी प्रदेश संसदीय दलका नेता पाण्डे यही वैशाख १४ गते मुख्यमन्त्रीमा नियुक्त भएका थिए।
६० सदस्यीय प्रदेशसभामा कांग्रेसका २७, नेकपा माओवादी केन्द्रका सात र नेकपा एकीकृत समाजवादी एक गरी ३५ प्रदेशसभा सदस्यको समर्थनमा उनी प्रदेशको चौथौ मुख्यमन्त्री बनेका हुन्।
मुख्यमन्त्री पाण्डेले विश्वासको मत लिएसँगै मन्त्रिपरिषद्लाई पूर्णता दिने तयारीमा छन्। प्रदेश सकारमा माओवादी केन्द्रका प्रदेशसभा सदस्य सुशीला सिंखडा र कांग्रेसकी सरस्वती अर्याल तिवारी विनाविभागीय छन्।
