धादिङ । नेपाल वितरक महासंघको ११ औँ साधारणसभा शनिवार धादिङमा सम्पन्न भएको छ । नेपाली कांग्रेसका महामन्त्री एवं प्रतिनिधिसभा सांसद गगन कुमार थापाको प्रमुख आतिथ्यतामा सम्पन्न सभामा ३७ जिल्लाका वितरकहरुको ठूलो मात्रामा उपस्थिति रहेको थियो ।
सभालाई सम्बोधन गर्दै महामन्त्री थापाले देशमा व्यापार व्यवसाय चलायमान बनेमा मात्र राज्यको अर्थतन्त्र सुदृढीकरण हुँदै जाने बताउनुभयो । सांसद थापाले व्यवसाय सञ्चालन गर्नका लागि देखा परेका समस्याहरू व्यवसायी स्वयमले लिस्टआउट गरेमा व्यवसायीलाई परेका समस्या समाधानका लागि प्रधानमन्त्री र मन्त्रीसमक्ष पुग्न सांसदहरुलाई सहयोग पुग्ने बताउनुभयो । उहाँले भन्नुभयो, “हामी व्यवसायीहरुलाई के भन्छौँ भने तपाईहरु आफ्ना समस्याहरु पहिला राम्रोसँग खोजेर लिष्ट बनाउनुहोस र हामीलाई उपलब्ध गराउनुहोस् ।” उहाँले थप्नुभयो, “तपाईहरुले यस्तो गर्नुभयो भने मात्र हामी सम्बन्धित निकायसम्म पुगेर समस्याको समाधान गरिदिनका लागि भन्न सक्छौँ ।”
सभामा महासंघका संस्थापक अध्यक्ष तथा वरिष्ठ सल्लाहकार गोविन्द कर्माचार्यलाई सम्मान गरिएको थियो । सम्मान ग्रहणपछि सभालाई सम्बोधन गर्दै उहाँले सामानहरु देशका विभिन्न ठाउँमाधुलो हिलो केहि नभनी पुर्याएर सेवा प्रवाह गर्ने गरेपनि देशमा रहेका विभिन्न व्यवस्थाहरुका कारण बारबाम्बारसमस्या भोग्नुपरेको बताउनुभयो ।
महासंघका अध्यक्ष हरिराज पन्तले बढ्दो आर्थिक मन्दि, बैंकहरुले मनोमानीढंगले गरेको व्याजदर वृद्धिको मार सबै क्षेत्रका व्यापारीलाई परेपनि राज्यले केहि ठूला व्यावसायिक संघसंगठनहरुलाई मात्र सम्बोधन गरेको बताउनुभयो । साथै उहाँले देशका विभिन्न ठाउँमा उपभोग्य वस्तु पुर्याउनकालागि नेपाल वितरक महासंघमा आबद्ध सदस्यहरुको ठूलो लगानी रहेपनि राज्यले वास्ता नगरेको गुनासोगर्नुभयो ।
