पोखरा, २६ भदौ । लायन्स क्लब अफ पोखरा सुन्दरनगरी र नेपाल पर्यटक यातायात व्यवसायी संघ(एनटिभिए) गण्डकी प्रदेशद्वारा संयुक्त रुपमा आयोजित रक्तदानमा ४७ युनिट रगत संकलन भएको छ ।
पोखरा महानगरपालिका वडा नं ६ स्थित केदारेश्वर मन्दिर गेट परिसरमा आयोजित रक्तदानमा लायन्स अन्तर्राष्ट्रिय डिष्ट्रिक्ट ३२५ के नेपालका पदाधिकारी, पोखरा पर्यटन परिषद्का अध्यक्ष पोमनारायण श्रेष्ठसहित पर्यटन सम्बद्ध संघ संस्थाका अध्यक्ष एवम् प्रतिनिधिको उपस्थिति रहेको थियो ।
लायन्स अन्तर्राष्ट्रिय मल्टीपल डिष्ट्रिक्ट ३२५ नेपालका पूर्व मल्टीपल काउन्सिल चेयरपर्सन दीपक श्रेष्ठले एनटिभिएका निवर्तमान अध्यक्ष बोबरजंग गुरुङलाई ब्लड ब्याग हस्तान्तरण गरी कार्यक्रमको उद्घाटन गरेका थिए ।
एनटिभिए गण्डकीका अध्यक्ष बाबुराम पाण्डेले संस्थागत रुपमा वर्षेनी रक्तदान कार्यक्रमलाई निरन्तरता दिएको बताउँदै रक्तदातालाई आभार एवम् कृतज्ञता व्यक्त गरे ।
एनटिभिएका अध्यक्ष पाण्डेको अध्यक्षता एवम् महासचिव विकासप्रसाद कंडेलले सञ्चालन गरेको कार्यक्रममा संयोजक श्याम लामिछानेले धन्यवाद व्यक्त गरेका थिए ।
उक्त अवसरमा पोखरा पर्यटन परिषद्का अध्यक्ष पोमनारायण श्रेष्ठ, एनटिभिएका संस्थापक अध्यक्ष एवम् सल्लाहकार मदन शर्मा खनाल, लायन्स अन्तर्राष्ट्रिय डिष्ट्रिक ३२५के नेपालका ब्लड डोनेशन चिफ श्यामकृष्ण श्रेष्ठ र डिष्ट्रिक्ट रिपोटिङ चिफ महेश पौडेल लगायतले रक्तदानको महत्वबारे प्रकाश पारेका थिए।
