पोखरा । लायन्स अर्न्तराष्टिय डिष्ट्रिक्ट ३२५ आई नेपालको चौथो क्याबिनेट मिटिङ नुवाकोटमा हुने भएको छ । नुवाकोटस्थित सम्पूर्ण क्लबहरुको संयुक्त आयोजनामा नुवाकोट जिल्लाको बिदुर नगरपालिका वडा नं. ४, बट्टार बजारस्थित बाजेको सेकुवाको सभा हलमा २०८२ बैशाख २७ गते शनिवार उक्त मिटिङ हुन गईरहेको डिष्ट्रिक्ट ३२५ आई नेपालका क्याविनेट सेक्रेटरी अमृत प्रसाद तिवारीले जानकारी दिए ।
नुवाकोट जिल्लामा रहेका क्लबहरू लायन्स क्लब अफ नुवाकोट क्यापिटल, नुवाकोट आदर्श, नुवाकोट सम्पदा, नुवाकोट बाराही र नुवाकोट इन्द्रेणीको संयुक्त आयोजनामा हुने क्याबिनेट मिटिङको तयारी अघि बढाइृएको मूल आयोजक समितिका संयोजक डिष्ट्रिक्ट ३२५ आई नेपालका डिष्ट्रिक्ट को–अर्डिनेटर अनुज कुमार श्रेष्ठले बताए ।
श्रेष्ठका अनुसार डिष्ट्रिक्ट रिडिष्ट्रिङ भए पछि पहिलो पटक हुन गईरहेको क्याविनेट बैठकमा ८ सय बढी लायन्सको सहभागिता हुने लक्ष्य राखेका छौं,’ उनले भने, ‘२ सय बढी क्लबको सहभागिता रहने अनुमान छ ।’
घुम्न वाउँ नुवाकोट भन्ने नाराका साथ आयोजना गरिएको क्याबिनेट मिटिङ आन्तरिक पर्यटन प्रवद्र्धन गर्नका लागि सहयोगी हुने श्रेष्ठले बताए । ‘आपसी भाइचारा अभिवृद्धिका लागि कार्यक्रम महत्वपूर्ण हुनेछ,’ उनले भने, ‘नुवाकोटमा रहेका धार्मिक, साँस्कृतिक महत्व बोकेका स्थलहरु नुवाकोट दरवार, पृथ्वीनारायण शाहको देहावसन पछि अन्तेष्टी गरिएको स्थान देविघाट, दुप्चेश्वर महादेव, वेत्रावती उत्तरगया धाम, गैगटे पार्क, नुवाकोट जिपलाईनलगाएतका क्षेत्रको प्रवद्र्धन गर्न तथा चिनाउन पनि कार्यक्रम सहयोगी हुनेमा हामी विश्वस्त छौं ।’
क्याविनेट मिटिङ तयारीका लागि मूल आयोजक समिति, विभिन्न उपसमिति र सल्लाहकार समिति पनि गठन गरी कार्य बिभाजन समेत गरिएको श्रेष्ठले बताए ।
