पोखरा । पोखरा महानगरपालिकाको १२ औं नगर सभा स्थगित भएको छ । एमालेबाट निर्वाचित जनप्रतिनिधिहरुले सभामा जातिय विभेद गर्ने वडाअध्यक्ष माथि कडा कारवाहि हुनुपर्ने माग राख्दै रुष्टोममा पुगेरै विरोध गरेपछि स्थगित भएको हो ।
नेपाली कांग्रेसबाट निर्वाचित जनप्रतिनिधिहरुले जातिय भेदभाव गर्ने वडा अध्यक्षलाई पक्राउ गरिसकेपछि पनि सभामा प्रक्रिया विपरित एमालेले कालो पट्टि बाधेर विरोध गर्नु अनुचित कार्य नभएको भन्दै बहिस्कार गरेका थिए । कांग्रेसले सभा बहिस्कार गरेपछि स्थगित भएको हो ।
मुख्यमन्त्री सहभागिता सभामा कालो पट्टि लगाएर एमालेको विरोध
सोमबार मात्रै गण्डकी प्रदेशका मुख्यमन्त्री नियुक्ति भएका खगराज अधिकारीलाई पहिलो कार्यक्रममै एमालेले कालो झण्डा सहित विरोध गरेको कांग्रेसका जनप्रतिनिधिहरुको भनाइ रहेको छ । नगरसभामा उपमेयर मञ्जुदेवी गुरुङले स्वागत मन्तव्य राखेसंगै मुख्यमन्त्री खगराज अधिकारीले गमलामा पानी हाली सभाको उद्घाटन गरेलगत्तै एमालेका जनप्रतिनिधिले विरोध गरेका थिए । उनीहरुले महिला हिंसा, जातिय विभेदको अन्त्य गर भन्दै नारावाजी सहित आफ्नो कुरा राख्नपाउनुपर्ने बताएपछि मेयर धनराज आचार्यले माइक दिन भनेका थिए । लगत्तै कार्यपालिका सदस्य दिपक घिमिरे रुष्टोममा पुगेर वडा २४ मा भएको जातिय विभेदको घटनाप्रति कार्यपालिका सदस्यको ध्यानाकर्षण भएको भन्दै विरोध गरेका थिए ।
उनले आर्थिक वर्ष २०७९/०८० को वार्षिक बजेट अन्तरगत लक्षित बजेट परिचालनको विषयमा छलफलको क्रममा वडा अध्यक्षद्धारा वडा सदस्य नेपाली माथि केन्द्रित गरेर जातिय विभेद गरेको बताए । उनले नेपाली बाहेक अन्य दुई सदस्यमाथि समेत विभेद गरेको आरोप लगाए ।
उता एमाले प्रमुख सचेतक दलकी नेता राधिका कुमारी शाहीले आफुहरुको कुनै योजना नै नरहेको स्पष्ट पारिन् । उनले नगरसभामा विरोध गर्ने पक्षमा आफुहरु नरहेको सुनाइन् ।
कांग्रेस प्रमुख सचेतक दलका नेता दिवस मान प्रधानांगले कार्यसूची विपरित बोल्न दिएको प्रति आफुहरुको आपत्ति रहेको बताए । उनले सभामा विरोधको कुनै कार्यक्रम नरहेको र बोल्ने अधिकार समेत नरहेको अवस्थामा कार्यपालिका सदस्य रुष्टोममा पुगेर बोल्नु सह्य नभएको सुनाए । ‘हामीले जातिय विभेद विरुद्ध विरोध गरेका कारण विरोध गरेका होइनौं । कार्यपालिकामा विपरित तरिकाले गरिएको विरोधको विरोध गरेका हौं’ उनले भने ।
बहिस्कारका बीच मुख्यमन्त्रीको मन्तव्य
सभामा कार्यपालिका सदस्यहरले बहिस्कार गरी बाहिर निस्किएको अवस्थामा समेत मुख्यमन्त्री खगराज अधिकारीले मन्तव्य दिएर हिडेका छन् । नगरसभाको उद्घाटन समारोहमा पुगेका मुख्यमन्त्री अधिकारीले विरोध भएको विषयमा आफुले केहि गर्न नसक्ने तर कानूनी राज्यमा आफु रहेको समेत बताए ।
उनले प्रदेश सरकार माइला छोरा जस्तो भएको प्रतिक्रिया समेत दिए । ‘प्रदेश माइला छोरा भयो । कान्छो छोरा स्थानीय तह भयो जेठा माथि (संघ) भयो । पितृ कार्यमा माइला छोराको जिम्मेवारी त्यति हुँदैन जति जेठा छोरा र कान्छा छोराको हुन्छ’ उनले भने, ‘केन्द्रमा जाँदा केन्द्रकै कुरा ठूलो । अधिकारको कुरामा संघीय कानून ठूलो । अनि तपाईको स्थानिय तहमा तपाईहरु नै ठूलो ।’ उनले पोखराको विकासका लागि महानगरले प्रदेश सरकारलाई सहयोग गर्न आग्रह समेत गरे । उनले विकासको योजना अघि बढाउँदै गर्दा कसैको मन नदुखाई नसकिने समेत सुनाए । गण्डकी प्रदेश पर्यटकीय शहर भएकाले हालै संचालनमा आएको अन्तर्राष्ट्रिय विमानस्थललाई अन्तर्राष्ट्रिय स्तरमा प्रचार गर्न समेत आवश्यक रहेको बताए ।
पक्राउ परे वडा अध्यक्ष अधिकारी
जातीय विभेद गरेको जाहेरीको आधारमा प्रहरीले पोखरा महानगरपालिका वडा २४ का वडा अध्यक्ष भरतबहादुर अधिकारीलाई पक्राउ गरेको छ । आफ्नै वडा सदस्य मैया नेपालीमाथि जातिय विभेद गरेको भन्दै प्रहरीमा जाहेरी दिएपछि उनलाई पक्राउ गरेको हो ।
नेपालीले आइतबार एक बजे प्रहरीमा जाहेरी दिएकी थिइन् । वडाअध्यक्ष अधिकारीलाई मंगलबार प्रहरीले पक्राउ गरेको हो ।
पुष १८ गते सोमबार वडामा स्थानीय आमा समूहहरलाई विभिन्न तालिम दिनका लागि छलफल डाकिएको अवस्थामा छलफललाई नै तालिमको उद्घाटन गर्ने तयारी भएपछि महिला वडा सदस्य सरस्वती त्रिपाठीले विरोध गरेकी थिइन् ।
अध्यक्ष अधिकारीले एकलौटि रुपमा उद्घाटन गर्ने भनि अडान लिदैँ गर्दा विरोध भएपनि नेपाली माथि खनिएर विभेदका भाषा प्रयोग गर्दै गालि गलौज गरेका थिए ।
अधिकारीलाई प्रक्राउ गरि अनुसन्धान भइरहेको जिल्ला प्रहरी कार्यालयका निमित्त प्रवक्ता ज्ञानबहादुर खड्काले जानकारी दिए ।
