पोखरा, २ वैशाख । अनलाइन पत्रकारका लागि ३ दिने अनलाइन पत्रकारिता तालिम शनिबारदेखि पोखरामा सुरु भएको छ । अनलाइन पत्रकार संघ गण्डकीले सञ्चालन गरेको तालिममा पोखरा क्रियाशील अनलाइन पत्रकारहरुको सहभागिता रहेको छ । शनिबार लेखन कलाका भरत कोइराला र डिजिटल पत्रकारिताका विषयमा केशवशरण लामिछानेले सहजीकरण गरेका थिए । सहभागीहरुलाई पत्रकार आचारसंहिताका सम्बन्धमा रामशरण बोहरा, तथ्य जाँच र अनलाईन पत्रकारिताका विषयमा दिपक अधिकारीले प्रशिक्षण दिने कार्यकालिका रहेको संघका सचिव प्रल्हाद चन्द्र घिमिरेले जानकारी दिए ।
यसअघि तालिमको शुभारम्भ गर्दै गण्डकी प्रदेश सरकारका आन्तरिक मामिला तथा कानूनमन्त्री रोशन बहादुर गाहा थापाले मन्त्रीको बधाईसँग बिदाई हुनुपरेको गुनासो गरे । सरकारको स्थायित्व नभएकोप्रति संकेत गर्दै उनले बधाई र बिदाई सँगसँगै भएको बताए ।
एकीकृत माओवादीको समर्थनमा एमाले नेता खगराज अधिकारीको नेतृत्वको गठन भएको सरकार हाल अल्पमतमा परेको छ । राष्ट्रपति निर्वाचनमा फेरिएको सत्ता समिकरणपछि गण्डकी प्रदेशमा माओवादीले एमालेलाई दिएको समर्थन फिर्ता लिएपछि मुख्यमन्त्री अधिकारी अल्पमतमा परेका हुन् । उनले ३० दिनभित्र संसदमा विश्वासको मत लिनुपर्ने संवैधानिक व्यवस्था छ । मुख्यमन्त्री अधिकारीले संसदमा विश्वासको मत लिने बताउँदै आएका छन् । यद्यपि उनले विश्वासको मत पाउने अवस्था छैन । संवैधानिक व्यवस्थाअनुसार मुख्यमन्त्री अधिकारीले वैशाख ९ गतेभित्र संसदमा विश्वासको मत लिने गरी प्रदेशसभा बैठक आव्हान गरिएको छ । यद्यपि मुख्यमन्त्री अधिकारीले अन्तिम समयमा राजीनामा दिने राजनीतिक विश्लेषकहरुको अनुमान छ ।
संघका अध्यक्ष गणेश बरालको अध्यक्षतामा भएको कार्यक्रममा नेपाल पत्रकार महासंघका केन्द्रिय सदस्य सरिता तिमिल्सिना, महासंघ गण्डकी प्रदेशका महासचिव गोविन्द सुवेदी, महासंघ कास्कीका उपाध्यक्ष रामप्रसाद तिमिल्सिना, अनलाइन पत्रकार संघ गण्डकीका उपाध्यक्ष सन्तोष बस्याल, महासचिव पल्हादचन्द्र घिमिरे लगाएत मन्तव्य राखेका थिए ।
