पोखरा। जिल्ला समन्वय समितिको कार्यालय कास्कीको आयोजनामा पोखरा महानगरपालिका लगायत कास्कीका सबै पालिकाहरूले आ.व २०८१\०८२ मा सम्पादन आपसमा असल अभ्यासका सम्बन्धमा अनुभव आदान प्रदान गरेका छन् ।
कार्यक्रममा पालिकाहरूको तर्फबाट भएका असल अभ्यासहरू प्रस्तुत गरिएका छन् । स्थानीय पालिकाहरूले आफ्नो क्षमता र स्रोत परिचालनको अवस्थाका आधारमा गरेका नवीन प्रयासहरूलाई असल अभ्यासका रूपमा अघि सारेका छन् ।
पोखरा महानगरपालिकामा अनुकरणीय कार्यका रूपमा चिस्यान सुविधा सहितको कृषि एम्बुलेन्स सञ्चालन, व्यवस्थित गौशाला निर्माण, प्राविधिक शिक्षाका रूपमा गण्डकी बहु प्राविधिक शिक्षालयको सञ्चालन, कृषकहरूलाई न्यूनतम सर्मथनमूल्य प्रदान, डिजिटल कृषि बजार सञ्चालन, कृषक प्रोत्साहन, स्थानीय उत्पादनको प्रवर्द्धन, प्याकेजिङ र ब्राण्डिङ, व्यवसाय प्रवर्द्धन केन्द्र सञ्चालन, नागरिक आरोग्य कार्यक्रम, पोखरा भ्रमण वर्ष, उपप्रमुखसँग महिला कार्यक्रम र व्यवस्थित गौशाला निर्माण लगायत रहेका उल्लेख गरिएको छ ।
नगर प्रमुख धनराज आचार्यले असल अभ्यासहरूको आदानप्रदानले आपसमा सिकाइ प्रवर्द्धनमा सहयोग पुग्ने विश्वास गरे । स्थानीय सरकारहरूले उपलब्ध स्रोत साधनको परिचालन मार्फत विकास निर्माण, मानव संसाधनको विकास, कर्मचारी तथा जनप्रतिनिधिहरूको क्षमता विकास, शिक्षा, स्वास्थ्य, वातावरण तथा पर्यावरण लगायतको क्षेत्रमा उल्लेखनीय कार्यहरू गरिरहेको बताए ।
जिल्ला समन्वय समितिका संयोजक लिलाधर पौडेलले स्थानीय सरकारहरूलाई समन्वय मार्फत सहजीकरण गर्ने कार्यमा आफूहरू प्रतिबद्ध रहेको बताए।
