अर्जुनचौपारी, स्याङ्जा । अर्जुनचौपारी गाउँपालिकाले पालिका भित्रका ३० ओटा सामुदायिक विद्यालयलाई स्वास्थ्य सामग्री वितरण गरेको छ। आर्थिक वर्ष २०८१/८२ को विद्यालय स्वास्थ्य कार्यक्रम अन्तर्गत छुट्टिएको बजेटबाट सामग्री वितरण गरिएको हो।
गाउँपालिकाले आयोजना गरेको कार्यक्रममा स्वास्थ्य सामग्री हस्तान्तरण गर्दै अध्यक्ष प्रकाश तिवारीले नागरिकको स्वास्थ्य सुनिश्चित गर्नका लागि गाउँपालिकाले विभिन्न स्वास्थ्य कार्यक्रम सञ्चालन गर्दै आएको बताए। उनले भने, “नागरिक स्वस्थ रहे पालिका स्वस्थ रहन्छ भन्ने विश्वासका साथ हामीले स्वास्थ्य परीक्षण र शिक्षा कार्यक्रम निरन्तरता दिएका हौं।”
पालिकाले वितरण गरेको प्राथमिक उपचार बाकसमा स्टेथोस्कोप, तौल नाप्ने मेसिन, थर्मोमिटर, अक्सिजन मापन गर्ने यन्त्र र कैची लगायतका सामग्री रहेका छन्। औषधिजन्य वस्तु भने नजिकैको स्वास्थ्य चौकीबाट लिन विद्यालयलाई सुझाइएको स्वास्थ्य शाखा प्रमुख इन्द्रबहादुर नेपालीले बताए। उनका अनुसार, यो कार्यक्रमका लागि कुल ३ लाख रुपैयाँ बजेट विनियोजन गरिएको हो।
विद्यालयमा विद्यार्थीलाई देखिने सामान्य रोगको तत्काल उपचार गर्न सजिलो होस् भन्ने उद्देश्यले सामग्री वितरण गरिएको गाउँपालिकाले जनाएको छ। साथै, पालिकाले हरेक महिना सामुदायिक र संस्थागत विद्यालयमा विद्यार्थीको स्वास्थ्य परीक्षण र स्वास्थ्य शिक्षा कार्यक्रम सञ्चालन गर्दै आएको छ।
अध्यक्ष तिवारीका अनुसार, पालिकाले नागरिकका आधारभूत आवश्यकता — स्वास्थ्य, शिक्षा र खानेपानीलाई प्राथमिकता दिइरहेको छ। उनले भने, “सिमित साधन स्रोतको अधिकतम सदुपयोग गरी नागरिकलाई प्रत्यक्ष लाभ दिलाउने हाम्रो लक्ष्य हो।”
विद्यालय मात्र होइन, पालिकाले ज्येष्ठ नागरिकहरूका लागि घरमै स्वास्थ्य परीक्षण र औषधि वितरणको व्यवस्था समेत गरेको छ। सुगर, प्रेसर लगायत रोगहरूको नियमित परीक्षण गरी घरमै औषधि उपलब्ध गराउने काम भइरहेको अध्यक्ष तिवारीले जानकारी दिए।
गाउँपालिकाले घरधुरीमा पुगेर स्वास्थ्यकर्मीमार्फत तथ्यांक संकलन गर्ने र सोही आधारमा नीति तथा कार्यक्रम तयार पार्ने अभ्यासले पालिकावासी खुशी भएको जनाइएको छ।
