अन्नपूर्ण, कास्की । ग्रामीण उद्यम तथा आर्थिक विकास आयोजना (REED) को आर्थिक सहयोगमा कास्कीको अन्नपूर्ण गाउँपालिका–२, ढिकुरपोखरीमा निर्माण गरिएको कृषि, पशुपन्छी तथा मत्स्य विकास सेवा केन्द्रको भवन उद्घाटन गरिएको छ। करिब १ करोड ९० लाख रुपैयाँको लागतमा निर्माण सम्पन्न भएको उक्त भवनको बिहीबार गाउँपालिका अध्यक्ष विष्णुबहादुर केसीले उद्घाटन गरेका हुन्।
कृषि तथा पशुपन्छी क्षेत्रलाई व्यावसायिक, आधुनिक र प्रविधिमैत्री बनाउने उद्देश्यले निर्माण गरिएको उक्त भवनमा १ करोड ५९ लाख १५ हजार १५१ रुपैयाँ खर्च भएको छ। त्यस्तै, कृषि तथा पशुपन्छीसम्बन्धी प्रयोगशाला उपकरण र फर्निचर व्यवस्थापनका लागि १५/१५ लाख रुपैयाँ खर्च गरिएको गाउँपालिकाका सूचना अधिकारी एवं पशु विकास अधिकृत ऋषिराम दाहालले जानकारी दिए।
दाहालका अनुसार नवनिर्मित सेवा केन्द्रबाट स्थानीय कृषक, पशुपालक तथा मत्स्य व्यवसायीले कृषि, पशु स्वास्थ्य र मत्स्य विकाससम्बन्धी प्राविधिक सेवा गाउँमै प्राप्त गर्न सक्नेछन्। केन्द्रमार्फत बालीमा लाग्ने रोग तथा कीराको परीक्षण, रोग पहिचान र उपचारसम्बन्धी परामर्शसमेत उपलब्ध हुनेछ।
उद्घाटन समारोहमा गाउँपालिका अध्यक्ष विष्णुबहादुर केसीले कृषि तथा पशुपन्छी क्षेत्र गाउँपालिकाको आर्थिक समृद्धिको महत्वपूर्ण आधार भएको बताए। उनले दुग्ध उत्पादन, व्यावसायिक पशुपालन, तरकारी खेती तथा कृषि उपज उत्पादनका आधारमा कृषकलाई प्रोत्साहन र अनुदानका कार्यक्रम सञ्चालन गर्दै आएको उल्लेख गर्दै नयाँ सेवा केन्द्रले कृषि क्षेत्रको विकासमा थप योगदान पुर्याउने विश्वास व्यक्त गरे।
कार्यक्रममा गाउँपालिका उपाध्यक्ष चन्द्रकला अधिकारीले पशुपन्छीको गोबर, थुनेलो तथा पिसाब परीक्षण, पशुको पोषणसम्बन्धी सेवा र रेबिज रोग परीक्षणलगायतका सुविधा उपलब्ध गराउने व्यवस्था गरिएको जानकारी दिइन्। उनले यसबाट सामान्य रोगको परीक्षण तथा उपचारका लागि पशुपालकले टाढाका सेवा केन्द्र धाउनुपर्ने बाध्यता कम हुने अपेक्षा व्यक्त गरिन्।
प्रमुख प्रशासकीय अधिकृत नवराज शर्माले ग्रामीण उद्यम तथा आर्थिक विकास आयोजना (REED) को आर्थिक सहयोग र अन्नपूर्ण गाउँपालिकाको समन्वयमा निर्माण भएको सेवा केन्द्र स्थानीय कृषि तथा पशुपन्छी क्षेत्रको विकासका लागि महत्वपूर्ण पूर्वाधार भएको बताए। केन्द्रले कृषि उत्पादन वृद्धि, पशुरोग नियन्त्रण, व्यावसायिक कृषि प्रवर्द्धन तथा कृषकको आयआर्जन बढाउन महत्वपूर्ण भूमिका खेल्ने उनको भनाइ थियो।
कार्यक्रममा अन्नपूर्ण गाउँपालिका–२ का वडाध्यक्ष पीताम्बर भण्डारीले कृषि तथा पशुपन्छी क्षेत्रको विकासका लागि प्रयोगशाला, प्राविधिक सेवा र सहज उपचार प्रणाली महत्वपूर्ण हुने बताए। उनले सेवा केन्द्रको स्थापनाले स्थानीय कृषक तथा पशुपालकलाई प्रत्यक्ष लाभ पुग्ने विश्वास व्यक्त गरे।
उद्घाटन कार्यक्रममा गाउँ कार्यपालिका सदस्य, जनप्रतिनिधि, कर्मचारी, राजनीतिक दलका प्रतिनिधि, आमा समूह, कृषक सञ्जाल, कृषि सहकारी संस्थाका पदाधिकारी, व्यावसायिक कृषक तथा स्थानीय नागरिक समाजका प्रतिनिधिहरूको सहभागिता थियो।
