पोखरा । भ्यालेन्टाइन डे अर्थात प्रेम दिवसको अवसरमा पोखरा म्याराथनमा सहभागि हुन चाहने जोडीहरुले अफर पाउने भएका छन् ।
नेपाली अग्रज खेलाडीहरुको छाता संस्था नेपाल भूतपूर्व खेलाडी मञ्चको आयोजनामा यहि फागुन ६ गते आयोजना हुने पोखरा अन्तर्राष्ट्रिय म्याराथनका लागि विशेष अफरको घोषणा गरेको हो । मञ्चको शनिबार सम्पन्न सचिवालय बैठकले प्रेम दिवसको अवसरमा जोडी (कपल)लाई दर्तामा छुटको अवसर दिने निर्णय गरेको हो । भ्यालेन्टाइन डेका दिन फागुन २ गतेका दिन जोडीलाई १ हजारमा दर्ता गर्न पाउने गरी छुटको व्यवस्था गरेको मञ्चका सचिव केशव पाठकले जनाएका छन् ।
“अहिले हामीले प्रति धावक अथवा सहभागि हुन आउनेलाई रु १ हजारमा टिशर्ट दिने गरी दर्ता गरेका छौं” सचिव पाठकले भने–“विश्वभरी मनाइने भ्यालेन्टाइन डेलाई मध्यनजर गर्दै फागुन २ गतेका दिन जोडीलाई टिशर्ट दिने गरी १ हजार दर्ता गरी अफर दिने निर्णय गरेका छौं ।” यो अफर पोखरा म्याराथनमा सहभागिता गराउने संगै आकर्षण समेत बढाउनका लागि विशेष दिनका लागि गरिएको उनको भनाई थियो । यो अफर पछि कुनै पनि जोडी दर्ता गराउन आएमा पोखरा म्याराथनको लोगो अंकित टिशर्ट पाउने छन् ।
पोखरा अन्तर्राष्ट्रिय म्याराथन नेपालकै जेठो म्याराथन र सर्वाधिक पुरस्कारको राशी समेत भएको म्याराथन हो । खेलाडी अन्तिम दर्ता नजिकिंदै जाँदा पोखरा म्याराथन अन्तर्गत हुने दौडमा हाल सम्म १ हजार भनदा वढीले आफ्नो नाम दर्ता गराई सकेको मञ्चले जनाएको छ । पोखरा म्याराथनकै लागि विभिन्न दश भन्दा वढि देशका धावकहरु समेत पोखरा आउने तयारी गरिरहेका छन् भने पोखरा महानगरको विभिन्न वडा र टोलहरुमा प्रचारात्मक अभियान समेत तिव्र पारिएको मञ्चले जनाएको छ ।
