पोखरा भ्यूज
पोखरा, ४ वैशाख । कोभिड-१९ का कारण रोकिएको अन्नपूर्ण म्याराथन तथा अन्नपूर्ण सेन्चुरी पर्यटन महोत्सवको तेस्रो संस्करण हुनेभएको छ । अन्नपूर्ण आरोहण दिवसमा अवसरमा हरेक वर्ष जुन ३ तारिखमा कास्कीको घान्द्रुकमा हुने म्याराथन र महोत्सवको तयारी अन्तिम चरणमा पुगेको आयोजक संस्था अन्नपूर्ण सेन्चुरी पर्यटन समितिले जानकारी दिएको छ । तेस्रो संस्करण म्याराथन र महोत्सव यही जेठ १७ देखि २० सम्म हुनेछ
घान्द्रुक पर्यटन व्यवस्थापन समितिको व्यवस्थापनमा हुन लागेको म्याराथन र महोत्सव विगत तीनवर्षदेखि रोकिएको थियो । अन्नपूर्ण आधारशिविरको पूर्वाधार विकास गरी त्यस क्षेत्रको पर्यटन प्रवद्र्धन गर्न ०७४ सालदेखि अन्नपूर्ण आधारशिविरबाट सेन्चुरी पर्यटन महोत्सव आरम्भ गरिएको थियो । सन् १९५० जुन ३ मा फ्रान्सेली पर्वतारोही मौरिस हर्जोगको टोलीले अन्नपूर्ण प्रथम हिमालको सफल आरोहण गरेको गरेपछि आठ हजार मिटरभन्दा अग्ला हिमाल आरोहणको इतिहासमा विश्व कीर्तिमानी राखेको सन्दर्भमा उक्त दिनलाई ‘अन्नपूर्ण आरोहण दिवस’का रुपमा मनाउने गरिएको छ ।
जेठ २० (जुन ३) मा अन्नपूर्ण आधारशिविरबाट सुरु हुने म्याराथन माछापुच्छ्रे आधार शिविर, बगर, देउराली, हिमालय, दोभान, सिनुवा, भनुवा, छोम्रोङ, तउलु, घुर्जुङ, चुइँले, कोम्रोङडाँडा, किम्रोङखोला, उरी हुँदै घान्द्रुकमा समापन हुने छ विहीबार पोखरामा आयोजित पत्रकार सम्मेलनमा संयोजक ललित गुरुङले जानकारी दिए । उनका अनुसार अन्नपूर्ण म्याराथनलाई अन्तर्राष्ट्रिय इभेन्टका रुपमा विकास गर्न यस वर्षदेखि अल्टिमेट एडभेन्चर नेपालले सघाउने भएको छ । म्याराथनको सम्पूर्ण प्राविधिक सहयोग उक्त कम्पनीबाट प्राप्त हुनेछ । बिहिबार सम्ममा म्याराथनतर्फ ४ विदेशीसहित २५ जना धावकले नाम दर्ता गराएका छन् ।
त्यसै गरी महोत्सवमा जेठ १७ बाटै भलिबल, बास्केटबल, छेलो, रस्साकसी लगायत प्रतियोगितात्मक खेलकुद र विविध साँस्कृतिक कार्यक्रम गरिन लागिएको घान्द्रुक पर्यटन व्यवस्थापन समितिलेका अध्यक्ष विक्रम गुरुङले बताए ।
म्याराथनमा पुरुषतर्फ पहिलो, दोस्रो र तेस्रो हुने धावकलाई क्रमशः १ लाख ५० हजार, १ लाख र ७५ हजार रुपैयाँ प्रदान गरिनेछ । महिलातर्फ पहिलो हुनेले ७५ हजार, दोस्रोले ५० हजार र तेस्रोले २५ हजार रुपैयाँ दिइने छ ।
त्यसै गरी महिला तथा पुरुष दुबैतर्फका लागि हुने म्याराथन पुरुष तर्फ पहिलो, दोस्रो र तेस्रो हुनेले क्रमश नगद रु १ लाख ५० हजार, १ लाख र ७५ हजार प्राप्त गर्नेछन् । त्यसै गरी महिलातर्फका विजेताले ७५ हजार, ५० हजार र २५ हजारका साथमा मेडल तथा प्रमाणपत्र प्राप्त गर्ने आयोजकले जनाएको छ । पुरुषतर्फ दर्ता शुल्क ७ हजार र महिलातर्फ ५ हजार तोकिएको छ ।
महोत्सव सम्पन्न गर्न करिब ८० लाख रुपैयाँ लाग्ने आयोजकको अनुमान छ । महोत्सवका लागि ५ सय १ सदस्यीय रहेको मुल व्यवस्थापन समिति, ३१ वटा विभिन्न उपसमिति गठन गरिएको छ ।
