पोखरा भ्यूज
पोखरा । भर्खर भर्खर जवानीका रङ र अनेकन उमङ्ग चढ्दै गरेका सङ्गीसाथी छुट्टिएर एक्कासी ३३ वर्षपछि भेट्दा सबैले सबैलाई शायदै चिने होलान् । लाली चढेको जवानी, भरभराउँदो शशरीरमा देखिएका साथीहरुका फुलेका केश, चाउरी परेको अनुहार देख्दै अधिकांश एक अर्कालाई हेरेको हेरेई भए । कतिले पुनः एक अर्कामा परिचय पनि गरे ।
कास्कीको तत्कालीन ढिकुरपोखरीमा रहेको माछापुच्छ्रे माध्यामिक विद्यालयबाट २०४७ सालमा एसएलसी दिने विद्यार्थीहरुको जमघटमा देखिएको दृश्य हो यो । रोजी र रोटीका लागि जिन्दगीको पापड पेल्दै अर्धशताब्दी पार गरेका प्रौढहरुको भेला निकै रोचक देखिन्थ्यो । भेलामा अधिकाँशले नयाँ परिचय पनि दिए । आफूले ३३ वर्षे अवधिमा पाएका दुःख, हण्डर र सफलताका कथासम्म सेयरिङ्ग गर्न भ्याए ।
त्यसो त करिब आठ वर्षअघिदेख़ि यी साथीहरु सामाजिक सञ्जाल फेसबुक ग्रुपमा जोडिएका थिए । त्यसरी जोडिने अभियान पत्रकार टंकराज अधिकारीले आरम्भ गरेका थिए । यसरी ग्रुपमा जोडिए पनि जमघट हुने अवसर जुरेको थिएन । तर दिपावलीको शुभकामना साट्न साथीहरू बीच भेलाको परिकल्पना गरे ।र, सबै साथीहरूको सहयोगमा आइतबार पोखरा २४ खड्गाउँस्थित मुनलाईट होमस्टे एण्ड क्यापिङ्ग साइटमा भेलाको संयोजन गरी साथीहरुको अुनभव र अनुभूति सुन्ने सुनाउने चाँजोपाँचो मिल्यो । उनीहरु माछापुच्छ्रे मावि, ढिकुरपोखरी एसएली व्याची समूह–२०४७ लेखिएको व्यानरमा गोलबन्द हुँदै पालैपालो आआफ्नो भोगाई सुनाउँदै गए । ‘३३ वर्षपछि यसरी भेट भएर एकअर्कालाई पढ्दै, नियाल्दै र त्यो बेलाको स्मरण गर्दै आफ्ना अनुभूति सुनाउन पाउँदा ख़ुशी लागेको छ । यो एउटा ऐतिहासिक अवसर हो,’ पूर्व बिधार्थी एवं नेपाली कांग्रेस कास्कीका जिल्ला उपसभापति समेत रहेका युवराज कुँवरले भने ।‘साथीहरुका अनुभव र अनुभूतिले नयाँ उमंग थपेको छ,’ हामी यो समूहलाई थप संगठित गर्दै रचनात्मक कार्यमा जुट्ने छौ, नेपाली सेनाका क्याप्टेन रहेका पूर्व विद्यार्थी भिमबहादुर भुजेलले भने । 
जमघट भेलामा परिणत, आगामी फागुन १९ गते बृहत् भेला सहित बनभोज कार्यक्रम गर्ने
माछापुच्छ्रे मावि, ढिकुरपोखरी एसएलसी व्याची समूह–२०४७ को पहिलो भेटघाट भेलामा परिणत भएको छ ।भेलाले ०४७ समूहका पूर्व बिधार्थी टंकराज अधिकारी संयोजक रहने गरी ९ सदस्य सचिवालय गठन गरेको छ ।सचिवालय सदस्यमा विष्णुप्रसाद शर्मा, हरिराम भण्डारी, नारायण बहादुर कुँवर, गणेश प्रसाद अधिकारी, हरिकुमारी केसी, सरस्वती अधिकारी, राजु प्रसाद दाहाल र देवनारायण पौडेल रहेका छन् ।
समूहले फागुन १९ गते बृहत् भेला सहित बनभोज कार्यक्रम गर्ने
समूहले आगामी फागुन १९ गते बृहत् भेला सहित बनभोज कार्यक्रम गर्ने भएको छ ।
एसएलसी ब्याची समूह–२०४७ बिच एकता अझ मझबुत र प्रगाढ बनाउने उद्धेश्यले बृहत् भेला सहित बनभोज कार्यक्रम गर्ने भएको छ ।
उक्त बनभोज कार्यक्रम मार्फत साथीहरू विचको एकता र आत्मीयता अभिबृद्धिमा टेवा पुग्ने विश्वास लिईएको समूहका सदस्य गणेशप्रसाद अधिकारीले बताए ।
