पोखरा भ्यूज
२९ मंसिर, काठमाडौं । गृह मन्त्रालयले १६ जिल्ला प्रमुख जिल्ला अधिकारी (सीडीओ) हरु हेरफेर गरेको छ । त्यस्तै एक महानिर्देशकको सरूवा गरेको छ भने ८ जना सहसचिवको पदस्थापन गरेको छ ।
उपप्रधान एवम् गृहमन्त्री नारायणकाजी श्रेष्ठले मन्त्रीस्तरीय निर्णय गर्दै शुक्रबार सीडीओ, महानिर्देशक र सहसचिवको पदस्थापना तथा सरूवा गरेका हुन् ।
गृहमन्त्रालयका अनुसार जिल्ला प्रशासन पाल्पामा कार्यरत सीडीओ बन्धुप्रसाद बास्तोलालाई झापाको प्रमुख जिल्ला अधिकारीकोरुपमा सरुवा गरिएको छ । कपिलवस्तुका शंकरहरि आचार्य सुर्खेतको प्रमुख जिल्ला अधिकारी बनेका छन् । सुर्खेतका नारायण प्रसाद सापकोटा भोजपुर पुगेका छन् ।
त्यस्तै, भोजपुरका हरिप्रसाद घिमिरे लाई उदयपुरमा प्रमुख जिल्ला अधिकारीको तोकिएको छ । उदयपुरका जनार्दन गौतम तनहुँको प्रमुख जिल्ला अधिकारीका रुपमा जिम्मेवारी दिइएको छ ।
गृह मन्त्रालयमा कार्यरत सहसचिव आनन्द काफ्लेलाई जिल्ला प्रशासन कार्यालय पाल्पामा पदस्थापना गरिएको छ। राष्ट्रिय परिचयपत्र तथा पञ्जीकरण विभागका महानिर्देशक झक्कप्रसाद आचार्य जिल्ला प्रशासन कार्यालय सिन्धुपाल्चोकमा सरूवा भएका छन्।
