पोखरा भ्यूज
पोखरा । तनहुँ जिल्लाको शुक्लागण्डकी नगरपालिका–१, सिम्लेस्थित एक विद्यालयमा अध्ययरत विद्यार्थीहरुलाई न्यानोकपडा तथा शैक्षिक सामाग्री वितरण गरिएको छ । लायन्स क्लब अफ पोखरा पिस सिटीको आयोजना जापानी नागरिक केईजी सातोको सहयोगमा श्री जनकल्याण प्राथमिक विद्यालयमा अध्ययरत विद्यार्थीहरुलाई न्यानो कपडा र शैक्षिक सामाग्रीहरु वितरण गरिएको हो ।
आइतवार बिधालय प्रांगणमा आयोजित एक कार्यक्रममा क्लबका अध्यक्ष युवराज खनाल, पूर्व अध्यक्षद्वय टंकराज अधिकारी र अर्जुन सिग्देल, सचिव रविकुमार श्रेष्ठले विद्यालय ब्यवस्थापन समितिका अध्यक्ष गोपाल प्रसाद काफ़्ले र प्रधानाध्यापक मदबहादुर कुँवरलाई हस्तान्तरण गरेका छन् ।
सामग्री हस्तान्तरण पश्चात बोल्दै लायन्स डिष्ट्रिक्ट ३२५ आई नेपालका मिडिया एण्ड कम्यूनिकेशन डिष्ट्रिक्ट को–अर्डिनेटर एवं क्लबका पूर्व अध्यक्ष टंकराज अधिकारीले नेपालमा सेवा प्रदायक समाजिक संस्थामा सबैभन्दा ठुलो र फैलिदै गएको संस्थाको लायनवादलाई लिईने बताउदै सामाजिक कार्यका लागि नेपालमा छुट्टै पहिचान बनाएको सामाजिक संस्था लायन्स क्लब भएको बताए । उनले समाज रुपान्तरणमा नेपालका लायन्सहरू निरन्तर संस्थागत रुपमा अघि बढिरहेको पनि जानकारी गराएका थिए ।
क्लबका अध्यक्ष युवराज खनालले सामाजिक उत्तरदायित्व अन्तर्गत जापानी नागरिक केईजी सातोको सहयोगमा क्लबमार्फत उक्त कार्यक्रम गरिएको बताए ।
विद्यालय ब्यवस्थापन समितिका अध्यक्ष काफ़्ले र प्रधानाध्यापक कुँवरले आर्थिक रुपमा विपन्न परिवारका बालबालिकालाई न्यायो कपडा र शैक्षिक सामग्री वितरण गरेर लायन्सले निकै उदाहरणीय काम गरेको भन्दै क्लब परिवारलाई धन्यवाद व्यक्त गरेका थिए ।