वीरगञ्ज । राष्ट्रिय प्रजातन्त्र पार्टी नेपालका अध्यक्ष कमल थापाले भ्रष्टाचारको मुद्दामा छानबिन शुरु भएसँगै प्रमुख राजनीतिक दलहरु एकै ठाउँमा उभिएको बताएका छन् । वीरगञ्जमा पार्टीको तराई–मधेस राष्ट्रिय सम्मेलनलाई सम्बोधन गर्दै अध्यक्ष थापाले भ्रष्टाचारीलाई जोगाउने प्रयासमा वर्तमान सरकार लाग्ने गरेको आरोप समेत लगाएका हुन् । थापाले अख्तियार दुरुपयोग अनुसन्धान आयोगको ठाउँमा मन्त्रीपरिषद्ले गरेका अनियमितता र भ्रष्टाचार छानविन गर्नसक्ने अधिकार सम्पन्न निकायका लागि संविधान संशोधन हुनुपर्ने बताए ।
उनले राजादेखि माओवादीसम्म अटाउने व्यवस्था नेपालको निमित्त उपयुक्त हुने बताए । उनले हिन्दुराष्ट्र र राजसंस्था पुनःस्थापनाको एजेण्डालाई आफूहरुले सँगै अघि बढाइरहेको पनि बताए ।
अध्यक्ष थापाले तराई/मधेस उत्थानको महत्वपूर्ण मुद्दाका रुपमा अहिले कायम रहेको भ्रष्ट व्यवस्था र भ्रष्ट शासकबाट देशलाई मुक्त तुल्याउनु आवश्यक रहेको बताए । विगत १८ वर्षदेखि अवलम्वन गरिएको त्रुटिपूर्ण अवधारणा र संरचनामा सुधार गर्नुपर्ने थापाले जोड दिएका थिए । उनले संघीय धर्मनिरपेक्ष गणतन्त्र असफल भएको छ । १८ वर्षको अनुभवलाई दृष्टिगत गर्दै हिन्दुराष्ट्र र राजसंस्था कायम गरी नेपाली संस्करणको मौलिक प्रजातान्त्रिक प्रणाली स्थापना गर्न लाग्न पनि सबैलाई आग्रह समेत गरेका थिए । सबै राजनीतिक शक्ति र विचार अटाउन सक्ने नेपाली संस्कारको मौलिक प्रजातन्त्र स्थापनाका निमित्त पहल गर्नुपर्ने उनको जोड़ थियो ।
‘देश अहिले संकट नै संकटको चक्रव्युहमा फसेको छ । त्यसको प्रभाव स्वभाविक रुपले तराई/मधेसमा पनि परेको छ । तराई/मधेसको उत्थानको कुरा गर्दा राष्ट्रियस्तरमा रहेको संकटलाई ध्यान दिनुपर्छ । तराई/मधेस उत्थानको एउटा महत्वपूर्ण मुद्दाका रुपमा अहिले कायम रहेको भ्रष्ट व्यवस्था र भ्रष्ट शासकबाट देशलाई मुक्त तुल्याउनु पनि एउटा महत्वपूर्ण र अभिन्न अंग हुनुपर्छ । विगत १८ वर्षदेखि अवलम्वन गरिएको त्रुटिपूर्ण अवधारणा र संरचनामा सुधार गर्नुपर्छ । सबै राजनीतिक शक्ति र विचार अटाउन सक्ने नेपाली संस्करको मौलिक प्रजातन्त्र स्थापनाका निमित्त पहल गर्नुपर्छ । राजादेखि माओवादीसम्म सबै अटाउने व्यवस्था नेपालको निमित्त उपयुक्त हुन्छ । हिन्दुराष्ट्र र राजसंस्था पुनःस्थापनाको एजेण्डालाई पनि सँगै अघि बढाउनेछौँ।’
उनले देशलाई संकटबाट मुक्त तुल्याउन राष्ट्रियता र प्रजातन्त्रप्रति प्रतिबद्ध शक्तिहरूलाई एकता र सहकार्यको निम्ति आह्वान गरेका थिए ।
