पोखरा । गण्डकी प्रदेशका मुख्यमन्त्री सुरेन्द्रराज पाण्डेले भाद्र २३ र २४ गते जेनजी आन्दोलनका क्रममा आगजनी र तोडफोडका कारण क्षतिग्रस्त कार्यालयहरूको स्थलगत निरीक्षण गरेका छन् ।
निरीक्षणपछि मुख्यमन्त्री पाण्डेले प्राथमिकताका आधारमा पुनर्निर्माण कार्य अघि बढाउन सम्बन्धित निकायलाई निर्देशन दिँदै नागरिकलाई सहज सेवा उपलब्ध गराउने तयारी भएको बताए । उनले आन्दोलन भड्काएर ध्वंश गर्नेहरूलाई कानुनी दायरामा ल्याउनुपर्नेमा जोड दिँदै युवाहरूको जायज मागलाई सम्बोधन गर्न सबै तहका सरकार गम्भीर हुनुपर्ने धारणा राखे ।
प्रदेश मातहतका भौतिक संरचना पुनर्निर्माणमा संघीय सरकारको नीति र बजेटका आधारमा थप योजना बनाई अघि बढ्ने उनले स्पष्ट पारे ।
मुख्यमन्त्री पाण्डेले आज मुख्यमन्त्री तथा मन्त्रिपरिषद्को कार्यालय, प्रदेश सभा, जिल्ला प्रशासन कार्यालय, जिल्ला प्रहरी कार्यालय, अख्तियार दुरुपयोग अनुसन्धान आयोगको कार्यालय र मुख्यमन्त्री निवासलगायतका स्थलको अवलोकन गरेका हुन् ।
