विशेष महाधिवेशन बहसले रोक्यो निर्णय–प्रक्रिया

काठमाडौँ । नेपाली काँग्रेसको केन्द्रीय कार्यसमिति बैठक फेरि स्थगित गरिएको छ। मुख्यसचिव कृष्णप्रसाद पौडेलले बिहीबार सूचना जारी गर्दै बैठक शनिबार दिउँसो १ बजे बस्ने गरी सारिएको जानकारी दिएका छन्।

यसअघि ३० कात्तिकमा सार्वजनिक सूचना अनुसार १ मंसिरका लागि बोलाइएको बैठक स्थगित गरेर बिहीबार राखिएको थियो। तर पुनः अर्को मितिमा धकेलिएको हो।

पार्टीभित्र अहिले सबैभन्दा ठूलो विवाद विशेष महाधिवेशन गर्ने कि नियमित महाधिवेशननै गर्ने भन्ने विषयमा केन्द्रित छ। विशेष महाधिवेशन चाहने समूहले हस्ताक्षर संकलनसमेत गरिसकेको छ। उनीहरूको तर्क—नेतृत्व समीक्षा, नीति अद्यावधिक र संगठनात्मक आमसुधार बिना पार्टी अघि बढ्न सक्दैन। संस्थापन पक्ष भने चुनावपछि मात्र नियमित महाधिवेशन हुनुपर्ने अडानमा छ। उनीहरूले आन्तरिक स्थिरता र नियमित प्रक्रियालाई प्राथमिकता दिनुपर्ने बताउँछन्। यो विवाद पार्टीको भविष्यको नेतृत्व संरचना, वैचारिक दिशा र संगठनात्मक सामर्थ्यसँग प्रत्यक्ष जोडिएको मानिन्छ।

२८ असोजबाट सुरु भएको बैठकमा नेताहरूले २७ कात्तिकसम्म आफ्ना धारणा राखिसकेका थिए। त्यसपछि २९ कात्तिक र १ मंसिरमा हुने भनिएका बैठकहरू स्थगित भए। विश्लेषकहरूका अनुसार–नेतृत्व स्तरमा एजेन्डामा सहमति नजुटेको, दुवै धारले समर्थन जुटाउने रणनीति अपनाएको, र आन्तरिक ‘मतैक्य’ बिना बैठक बसे पनि परिणाम ननिस्किने आकलनले बैठक बारम्बार सारिएको देखिन्छ। काँग्रेसजस्तो पुरानो लोकतान्त्रिक दलको बैठक लगातार स्थगित हुनु संगठनात्मक कमजोरीको संकेतका रूपमा पनि हेर्न थालिएको छ।

बैठक स्थगित हुने क्रमले कार्यकर्तामा अनिश्चितता र असन्तुष्टि, मतदातामा विश्वास घट्ने जोखिम, गठबन्धन विपक्षी तथा साझेदार दलहरूमा सन्देह र अस्पष्टता, राजनीतिक स्थिरताको खोजीमा बसेका मतदाताका दृष्टिमा यस्तो अनिश्चितता काँग्रेसको छविमा प्रतिकूल असर पार्न सक्छ।

विशेष वा नियमित—जुनसुकै मार्ग रोजे पनि पार्टीले अब स्पष्ट निर्णय लिनु अपरिहार्य भएको विशेषज्ञहरूको धारणा छ। निश्चित टाइमलाइन तयार गर्ने, विवाद समाधानका लागि संवाद संयन्त्र सक्रिय बनाउने, सदस्यता तथा संगठन व्यवस्थापनमा ठोस सुधार ल्याउने, जस्ता एजेन्डामा काँग्रेसले शीघ्र कदम चाल्नुपर्ने सुझावहरू जहानिएका छन्।

महाधिवेशनको स्वरूप जो भए पनि, त्यसले काँग्रेसलाई दीर्घकालीन संगठनात्मक दिशा र नेतृत्वगत स्पष्टता दिने अपेक्षा कार्यकर्ताहरूको रहेको छ।