पोखरा । नेपाली कांग्रेस पोखरा महानगरपालिका वडा नं. ७ वडा कार्यसमितिले विजयादशमी, शुभ दीपावली, नेपाल संवत् तथा छठ पर्वको अवसरमा शुभकामना आदानप्रदान कार्यक्रम सम्पन्न गरेको छ। सोही अवसरमा नेपाली कांग्रेसको १५औँ महाधिवेशनबाट विभिन्न तहमा निर्वाचित नेता तथा प्रतिनिधिहरूलाई सम्मान तथा बधाई ज्ञापन गरिएको छ।
वडा कार्यसमितिले आयोजना गरेको कार्यक्रममा पार्टीका केन्द्रीय, प्रदेश, क्षेत्रीय तथा महानगर तहका नेताहरूको सहभागिता रहेको थियो। कार्यक्रममा चाडपर्वको शुभकामना आदानप्रदानसँगै पार्टीको संगठन सुदृढीकरण, नेतृत्वको जिम्मेवारी, राष्ट्रिय राजनीति, धार्मिक पहिचान, युवा उद्यमशीलता र रोजगारीका विषयमा समेत विचार विमर्श गरिएको थियो।
कार्यक्रमका प्रमुख अतिथि नेपाली कांग्रेस गण्डकी प्रदेशका सभापति शुक्रराज शर्माले नेपाललाई धार्मिक स्वतन्त्रतासहितको वैदिक सनातन हिन्दु राष्ट्रका रूपमा पुनःपरिभाषित गर्नुपर्ने धारणा राखे। नेपालको मौलिक पहिचान, ऐतिहासिक निरन्तरता र राष्ट्रिय एकतालाई बलियो बनाउन यस्तो अवधारणा आवश्यक रहेको उनको भनाइ थियो।
शर्माले धर्मनिरपेक्षताले नेपालको मौलिक पहिचान र राष्ट्रिय एकतामा असर पारेको दाबी गर्दै यस विषयमा गम्भीर समीक्षा हुनुपर्ने बताए। धर्मनिरपेक्षताको निर्णयले देश, जनता र प्रजातन्त्रमाथि धोका भएको आफ्नो धारणा राख्दै उनले यस विषयमा देशसँग माफी माग्नुपर्ने समेत बताए।
उनले धार्मिक स्वतन्त्रतासहितको सनातन धार्मिक राज्यको अवधारणा कुनै धर्म वा सम्प्रदायको पक्ष वा विपक्षमा नभई नेपालको मौलिक पहिचान र ऐतिहासिक निरन्तरताको सम्मान भएको स्पष्ट पारे। साथै, राजनीतिक स्थायित्व, शान्ति र राष्ट्रिय एकताका लागि २०४७ सालको संविधानका मूलभूत सबल पक्षलाई वर्तमान राजनीतिक परिवेशअनुसार परिमार्जनसहित पुनःस्थापित गर्न नेपाली कांग्रेसले पहल गर्नुपर्नेमा जोड दिए।
कार्यक्रममा नेपाली कांग्रेसका केन्द्रीय सदस्य किरण केसीले युवालाई राजनीति, उद्यमशीलता र रोजगारीसँग जोड्नु आजको आवश्यकता भएको बताए। वडा नं. ७ का स्थानीय बासिन्दासमेत रहेका केसीले आफूलाई केन्द्रीय सदस्यसम्म पुग्न कार्यकर्ताको प्रेरणा, माया र ममताले महत्वपूर्ण भूमिका खेलेको उल्लेख गर्दै प्राप्त जिम्मेवारीलाई जनतासँग जोडिएर काम गर्ने अवसरका रूपमा लिएको बताए।
देशको वर्तमान आर्थिक अवस्थाप्रति चिन्ता व्यक्त गर्दै उनले ब्याजदर कम हुँदा पनि लगानीको वातावरण बन्न नसकेको, युवाहरू रोजगारीका लागि विदेशिन बाध्य भएको र नेतृत्व तहमा समेत संकट देखिएको बताए।
‘युवालाई राजनीति र उद्यममा जोड्न सकिन्छ भनेर कांग्रेस केन्द्रीय सदस्य बनेको हुँ,’ केसीले भने, ‘राजनीतिलाई उद्यम, व्यवसाय र निजी क्षेत्रसँग जोड्न नेतृत्व तहमा उद्यमीहरू पनि आउनुपर्छ।’
उनले युवालाई राजनीतिक भाषणमा मात्र सीमित नराखी रोजगारी, उद्यम र अवसरसँग जोड्ने पहल गर्ने प्रतिबद्धता व्यक्त गरे। युवापुस्ताको ऊर्जा, उद्यमशीलता र निजी क्षेत्रको अनुभवलाई राजनीतिक नेतृत्वसँग जोड्न सके मुलुकको आर्थिक विकासमा महत्वपूर्ण योगदान पुग्ने उनको धारणा थियो।
त्यसैगरी, नेपाली कांग्रेसका केन्द्रीय सदस्य लक्ष्मी पाण्डेले मुलुकको वर्तमान राजनीतिक अवस्थाप्रति चिन्ता व्यक्त गर्दै राज्य सञ्चालन अपेक्षाअनुसार हुन नसकेको बताइन्। विषम परिस्थितिमा नेपाली कांग्रेसले नेतृत्वदायी भूमिका निर्वाह गर्दै आएको उल्लेख गर्दै उनले पार्टीका नेता तथा कार्यकर्ताहरू थप जिम्मेवार र एकताबद्ध भएर अघि बढ्नुपर्ने बताइन्।
नेपाली कांग्रेस गण्डकी प्रदेशका प्रवक्ता माधवप्रसाद बास्तोलाले पार्टीको संगठन, नेतृत्व र समसामयिक राजनीतिक विषयमा आफ्नो धारणा राखेका थिए।
कार्यक्रममा कास्की क्षेत्र नं. २ का क्षेत्रीय सभापति एवं पोखरा महानगरपालिका वडा नं. ७ का निवर्तमान सभापति नवीन बरालले पार्टीलाई थप गतिशील र सुदृढ बनाउन सबैको साथ, सहयोग र समर्थनलाई जिम्मेवारीपूर्वक कार्यान्वयन गर्दै अघि बढ्ने प्रतिबद्धता व्यक्त गरे। उनले संगठनको एकता, सहकार्य र सामूहिक जिम्मेवारीलाई आत्मसात् गर्दै पार्टीलाई जनतामाझ अझ प्रभावकारी बनाउनुपर्नेमा जोड दिए।
कार्यक्रममा नेपाली कांग्रेस पोखरा महानगर सभापति सुरेन्द्र बिजुक्छे, प्रजातन्त्र सेनानी एवं महाधिवेशन प्रतिनिधि शोभाचन्द्र बराल, कास्की क्षेत्र नं. २ प्रदेशसभा (क) का सभापति भोजराज आचार्य तथा पोखरा महानगरपालिका वडा नं. ७ का अध्यक्ष राममोहन आचार्यलगायतले शुभकामना मन्तव्य व्यक्त गरेका थिए।
सो अवसरमा १५औँ महाधिवेशनबाट विभिन्न तहमा निर्वाचित नेता तथा प्रतिनिधिहरूलाई सम्मान तथा बधाई ज्ञापन गरिएको थियो। वक्ताहरूले निर्वाचित नेतृत्वले आफूलाई प्राप्त जिम्मेवारी इमानदारीपूर्वक निर्वाह गर्दै पार्टी संगठन सुदृढीकरण, कार्यकर्ताबीच एकता र जनतासँगको सम्बन्ध विस्तारमा विशेष ध्यान दिनुपर्ने बताएका थिए।
कार्यक्रमले विभिन्न चाडपर्वको सांस्कृतिक तथा सामाजिक महत्वलाई आत्मसात् गर्दै आपसी सद्भाव, भाइचारा र एकताको सन्देश प्रवाह गरेको थियो। सहभागीहरूले विजयादशमी, शुभ दीपावली, नेपाल संवत् तथा छठ पर्वको अवसरमा सम्पूर्ण नेपालीमा सुख, शान्ति, समृद्धि, सुस्वास्थ्य र उत्तरोत्तर प्रगतिको शुभकामना व्यक्त गरेका थिए।
नेपाली कांग्रेस पोखरा महानगरपालिका वडा नं. ७ का सभापति दामोदर बरालको सभापतित्वमा सम्पन्न कार्यक्रमको सञ्चालन वडा कार्यसमितिका सचिव सुमन पौडेलले गरेका थिए।
