काठमाडाैं । आगामी मे ३ देखि ६ तारिखसम्म मलेसियामा हुने ओकिनावा गोजु–रियो खुला अन्तर्राष्ट्रिय कराँते प्रतियोगिता २०१९ मा सहभागी हुने खेलाडीहरुलाई बिदाई गरिएको छ ।
ओकिनावा गोजु–रियो एसोसिएशन नेपालले काठमाडौंमा आयोजना गरेको कार्यक्रममा नेपालको प्रतिनिधित्व गर्ने तीन खेलाडीसहित पाँच सदस्यीय टोलीको बिदाई गरिएको हो । एसोसिएशनका अनुसार उक्त प्रतियोगितामा विवश घिमिरे, विनोदमान श्रेष्ठ र कुमार चौलागाईले सहभागिता जनाउनेछन् । प्रतियोगिताको निर्णायक भूमिकामा रञ्जनमान श्रेष्ठ र टोली व्यवस्थापकमा जितेन्द्र प्रसाद साह रहनेछन् । एन्फा अध्यक्ष कर्मा छिरिङ शेर्पा, साउथ एसिएन कराँते महासंघका उपाध्यक्ष पुरेन्द्र बिक्रम लाखे र समाजसेवी ईश्वलाल जोशीलगायतले खेलाडीहरुलाई विदाई गरेका हुन् । .
कार्यक्रममा प्रशिक्षक रञ्जनमान श्रेष्ठले आफूहरुलाई राज्यको तर्फबाट कुनै सहयोग नभएको गुनासो गर्नुभयो । साउथ एशिएन कराँते महासंघका उपाध्यक्ष पुरेन्द्र बिक्रम लाखेले कराँते खेलको जन्म जापानबाट नभई नेपालबाटै भएको दाबी गर्नुभयो ।
