पोखरा भ्यूज
घान्द्रुक २७ वैशाख । अन्नपूर्ण गाउँपालिका वडा नं. १० स्थित कोटगाउँ आमा समूहले आफ्नै सामुदायिक भवन निर्माण गरेको छ । जग्गादाता कप्तान पदमलाल गुरुङले भवन निर्माण गर्ने जग्गा उपलब्ध गराएपछि उक्त जग्गामा आमा समूहले सामुदायिक भवन निर्माण गरेको हो ।
करिव ४९ लाख ९० हजार ९८३ रुपियाँको लागतमा भवन निर्माण कार्य पूरा भएको कोषाध्यक्ष आइबहादुर गुरुङले जानकारी दिएका छन् । उनका अनुसार अन्नपूर्ण संरक्षण क्षेत्र आयोजना (एकयापबाट रु. २० लाख रुपियाँ सहयोग प्राप्त भएको थियो भने ५ लाख प्रदेश सरकारबाट प्राप्त भएको थियो। बाँकी रकम देश विदेशमा रहनुभएका घान्द्रुकेहरुको संगठित संघसंस्थाबाट सहयोग प्राप्त भएको थियो ।
यसैबीच कोटगाउँ आमा समूहले वुधबार आयोजना गरेको एक बीच समाजसेवी उक्त नवनिर्मित भवनको कप्तान पद्मलाल गुरुङले उद्घाटन गरेका छन् । उनले जन्मथलो घान्द्रुकका लागि खास केही गर्न नसके पनि पुख्र्यौली जग्गा आमा समूहलाई हस्तान्तरण गरी सामुदायिक भवन निर्माण सहयोग गर्न सकेकोमा खुशी लागेको बताए ।
पूर्वमन्त्री प्रकाश बहादुर गुरुङले जग्गा दान जस्तो पुण्य कर्म अरु केही नभएको चर्चा गर्दै जग्गादाताको कर्मको मुक्तकण्ठले प्रशंसा गरे । उनले सामाजिक सेवा भावबाट मात्र विकास हुनेमा जोड दिए । कार्यक्रममा जग्गादाता एवं चन्दाताहरुलाई कदरपत्रसहित दोसल्ला ओढाएर सम्मान गरिएको थियो । त्यस्तै कार्यक्रममा विविध साँस्कृति कार्यक्रम समेत प्रस्तुत गरिएको थियो । त्यस क्रममा आमा समूहको तर्फबाट जग्गादातालाई समेत सम्मान गरिएको थियो ।
कोट गाउँ आमा समूहका अध्यक्ष सुष्मा गुरुङको अध्यक्षतामा भएको कार्यक्रममा चन्दाताका तर्फबाट नन्दकुमारी गुरुङ, मेश्रम वराह माविका विद्यालय व्यवस्थापन समितिका पूर्वअध्यक्ष मेजर ललितमान गुरुङ, समाजसेवी कप्तान रुपबहादुर गुरुङ, तमु प्यल्हु संघका अध्यक्ष प्रेम गुरुङ, तत्कालीन घान्द्रुक गाविसका उपाध्यक्ष तीलबहादुर गुरुङ, कोट गाउँ आमा समूहका अध्यक्ष सविता गुरुङ लगायतका वक्ताहरुले सामाजिक क्षेत्रको विकास र पूर्वाधारका विविध पक्षबारे चर्चा गरेका थिए ।
