पोखरा भ्यूज
२१ भदौ, काठमाडौं । सर्वोच्च अदालतले कोशी प्रदेशका मुख्यमन्त्री उद्धव थापालाई पदमुक्त हुने ठहर गर्दै प्रदेशसभाको सबभन्दा ठूलो दल नेकपा एमालेका संसदीय दलका नेता हिक्मतकुमार कार्कीलाई ४८ घण्टाभित्र नयाँ मुख्यमन्त्री नियुक्त गर्न परमादेश दिएको छ ।
न्यायाधीशहरु सपना प्रधान मल्ल, डा. कुमार चुडाल र नहकुल सुवेदीको पूर्ण इजलासले सभाको अध्यक्षता गरेका व्यक्तिले दिएको मतलाई संविधानसम्मत भन्न नमिल्ने ठहर गरेको हो ।
गएको १६ साउनमा मुख्यमन्त्री नियुक्त भएका थापाले ४ भदौमा विश्वासको मत लिएका थिए । त्यस क्रममा उनले प्रदेशसभा बैठकको अध्यक्षता गरेका इस्राइल अन्सारीलाई मतदान गर्न लगाएर विश्वासको मत पाएको घोषणा गर्न लगाएका थिए ।
त्यसउपरमा एमाले संसदीय दलका नेता कार्की सर्वोच्चमा आफूलाई मुख्यमन्त्री नियुक्त गरी पाउँ पाउन परमादेश जारी गर्न रिट निवेदन दिएका थिए । थापाले पाएको विश्वासको मत असंवैधानिक भएको सर्वोच्चको ठहर छ ।
पटक–पटक विश्वासको मत पाउने अवसर दिन नसकिने भन्दै पूर्ण इजलासले अर्को प्रक्रियामा जानुपर्ने आदेश गरेको हो । थापा २१ असारमा संविधानको धारा १६८(२) अनुसार मुख्यमन्त्री नियुक्त भएका थिए ।
