काठमाडौं । नेपाली कांग्रेसभित्र चर्किएको आन्तरिक द्वन्द्व फेरि सतहमा आएको छ। संस्थापनइतर समूहले पार्टी सदस्यता कुनै नेताको व्यक्तिगत आवेग वा भाषणको भरमा खारेज गर्न नसकिने स्पष्ट सन्देश दिएको छ, जसले नेतृत्वविरुद्ध कडा राजनीतिक प्रहार गरेको देखिन्छ।
निवर्तमान कार्यवाहक सभापति पूर्णबहादुर खड्काले सोमबार जारी गरेको विज्ञप्तिमार्फत पार्टी सदस्यताको विषयलाई ‘इतिहास, त्याग र बलिदानसँग जोडिएको संवेदनशील सवाल’ भन्दै एकल निर्णयको शैलीप्रति कडा आपत्ति जनाएका छन्।
उनले पञ्चायती निरंकुशताविरुद्धको संघर्ष सम्झाउँदै भनेका छन्, “ज्यानको बाजी राखेर लिइएको सदस्यता कुनै नेताले आवेग, उत्तेजना वा लहडमा खारेज गर्न सक्ने विषय होइन।” यस अभिव्यक्तिले पार्टी नेतृत्वको हालको कार्यशैलीमाथि सीधा प्रश्न उठाएको छ।
खड्काले सदस्यतालाई केवल पार्टी आबद्धताको कागज नभई राष्ट्रिय स्वाधीनता, लोकतन्त्र र शहीदहरूको सम्मानसँग गाँसिएको ऐतिहासिक पहिचानको रूपमा व्याख्या गरेका छन्। “महाधिवेशनको वैधानिक निर्णयबाहेक कसैले पनि आम सदस्यको क्रियाशील सदस्यता खारेज गर्न सक्दैन,” उनले स्पष्ट पारे।
तर, कांग्रेसभित्रको विवाद केवल सदस्यतामा सीमित छैन। १५ औं महाधिवेशनको कार्यतालिका, विशेष महाधिवेशनको वैधता र नेतृत्व चयन प्रक्रियाले पार्टीलाई अझै गहिरो विभाजनतर्फ धकेलेको छ।
यसअघि सर्वसम्मत रूपमा तय गरिएको वैशाख २८–३१ को महाधिवेशन तोकिएको समयमा हुन नसक्नु र त्यसपछि विभिन्न समूहबीच देखिएको मतभेदले नेतृत्व संकटलाई उजागर गरेको छ। विशेष महाधिवेशनमार्फत नयाँ कार्यसमिति चयन गरिएको भए पनि त्यसको वैधता र प्रक्रियामाथि प्रश्न उठिरहेका छन्।
संस्थापनइतर समूहले हालै घोषणा गरिएको अर्को महाधिवेशन तालिकाप्रति पनि असहमति जनाउँदै नेतृत्वको निर्णयप्रक्रियामाथि अविश्वास प्रकट गरेको छ।
उता, केन्द्रीय अनुशासन समितिले कार्यवाहक सभापतिको हैसियतमा वक्तव्य जारी गरेको विषयलाई लिएर कारबाही प्रक्रिया अघि बढाउने संकेत दिएको छ, जसले विवादलाई अझ चर्काउने देखिन्छ।
यसैबीच, खड्काले अघिल्ला दिनहरूमा सरकारका कदमविरुद्ध आवाज उठाउनु र पार्टीभित्रै बैठक बोलाएर सक्रियता देखाउनुले कांग्रेसभित्र समानान्तर शक्ति केन्द्र सक्रिय रहेको संकेत दिएको छ।
