भिमाद, तनहुँ । लायन्स क्लब अफ पोखरा पिपल चौतारीले आफ्नो छैटौँ स्थापना दिवस भिमाद नगरपालिका–५ स्थित मिछुर्लुंग होमस्टेमा एक कार्यक्रमका बीच मनाएको छ।
क्लबका अध्यक्ष लोकनाथ अधिकारीको अध्यक्षतामा सम्पन्न कार्यक्रममा क्लबका संस्थापक अध्यक्ष तथा लायन्स डिष्ट्रिक्ट ३२५ आई नेपालका पहिलो डिष्ट्रिक्ट गभर्नर राम बसेलको प्रमुख आतिथ्यतामा सम्पन्न भएको थियो भने डिष्ट्रिक्ट एडमिनिस्ट्रेटर टंकराज अधिकारी र नापी कार्यालय कास्कीका प्रमुख सुभाष भण्डारी विशेष अतिथि रहेका थिए।
कार्यक्रममा क्लबका पूर्व अध्यक्षहरू शिव खड्का, डा.ढाका कुमार श्रेष्ठ, कुमार क्षेत्री, शिव केसी र बसन्त कार्की, कार्यक्रम संयोजक कृष्ण रानाभाटसहित पदाधिकारी तथा सदस्यहरूको उल्लेखनीय उपस्थिति रहेको थियो।
प्रमुख अतिथि राम बसेलले सम्बोधन गर्दै कुनै पनि संस्थाले निरन्तर राम्रो काम नगरी शतवार्षिकी मनाउन नसक्ने उल्लेख गरे। लायन्स अन्तर्राष्ट्रिय सामाजिक सेवाभावबाट स्थापना भएको संस्था भएको बताउँदै उनले लायन्स क्लबलाई केवल संस्था मात्र नभई सेवाभाव, मित्रता र नेतृत्व विकासको विद्यालयका रूपमा व्याख्या गरे। लायन्स क्लब परिवार सदस्यहरूको दोस्रो घरजस्तै भएको उल्लेख गर्दै उनले स्थापना भएको छ वर्षको अवधिमा क्लबले शिक्षा, स्वास्थ्य, वातावरण, विपन्न तथा आपतकालीन सहयोगका क्षेत्रमा उल्लेखनीय योगदान दिएको प्रशंसा गरे। “We Serve” भन्ने मूल मन्त्रलाई व्यवहारमा उतार्दै समुदायमा सकारात्मक परिवर्तन ल्याउन क्लब सफल भएको उनको भनाइ थियो।
यसै अवसरमा डिष्ट्रिक्ट एडमिनिस्ट्रेटर टंकराज अधिकारीले शुभकामना मन्तव्य राख्दै संस्थापक अध्यक्ष तथा संस्थापक टिमको दूरदृष्टि र निःस्वार्थ सेवाभावकै कारण क्लब आज मजबुत संस्थाका रूपमा स्थापित भएको बताए। उनले पूर्व तथा वर्तमान नेतृत्वको सक्रियता र समर्पणको प्रशंसा गर्दै आगामी दिनमा नवीन सोच, दिगो कार्यक्रम र युवाको सहभागितामार्फत समाजसेवामा अझ नयाँ उचाइ हासिल गर्न शुभकामना व्यक्त गरे।
क्लबका अध्यक्ष लोकनाथ अधिकारीले क्लबभित्रको एकता, सेवाभाव र सामाजिक उत्तरदायित्वलाई थप सुदृढ बनाउँदै अघि बढ्ने विश्वास व्यक्त गरे।
कार्यक्रममा प्रथम उपाध्यक्ष सुभकार उप्रेतीले स्वागत मन्तव्य, क्लबका पूर्व अध्यक्ष डा. ढाका कुमार श्रेष्ठले धन्यवाद मन्तव्य राखेका थिए भने कार्यक्रम सञ्चालन सचिव बसन्त बास्तोला र ध्वजाको अभिवादन पाठ कोषाध्यक्ष संकल्प बसेलले गरेका थिए। सो अवसरमा ठाकुर लामिछाने र रमेश अधिकारीलाई नयाँ सदस्यका रूपमा क्लबमा आबद्ध गरिएको छ।
