पोखरा। पोखरा लेडी जेसिजले सामाजिक उत्तरदायित्व र महिला सशक्तिकरणमा आफ्नो सक्रियता जारी राख्दै वर्ष २०२६ का लागि नयाँ समितिको पदस्थापन गरेको छ। नयाँ समितिको अध्यक्षमा सुनिता गौतम भण्डारी चयन भएकी छन्।
पदस्थापन कार्यक्रम नेपाल जेसीजका राष्ट्रिय अध्यक्ष जेसीआई सिनेटर जीवन कार्की, क्षेत्र ख प्रतिनिधि राष्ट्रिय कार्यकारिणी उपाध्यक्ष जेसी सपना पौडेल भण्डारी, दुर्गा लामिछाने, र राष्ट्रिय उपाध्यक्ष जेसी आरोग्य श्रेष्ठले संयुक्त रूपमा सम्पन्न गरेका थिए।
कार्यक्रमको उद्घाटन वर्ष २०२५ की अध्यक्ष सिनेटर अनिता थापाको अध्यक्षतामा भएको थियो। उद्घाटन सत्रमा अध्यक्ष सिनेटर जीवन कार्कीले पोखरा लेडी जेसिज सामाजिक क्षेत्रमा निकै सक्रिय रहेको बताउँदै भने, “मानवीय सेवाका लागि जेसिज जहिले पनि तयार हुन्छ।”
सो अवसरमा वर्ष २०२५ का पदाधिकारीहरूले वर्ष २०२६ का पदाधिकारीहरूलाई औपचारिक रूपमा पद हस्तान्तरण गरेका थिए। कार्यक्रमको संयोजन जेसी सन्तोषी अर्यालले गरेकी थिइन् भने संचालन जेसी सिर्जना आलेले गरेकी थिइन्।
पदस्थापन कार्यक्रममा करिब १ सय ७५ जनाको सहभागिता रहेको थियो। पोखरा लेडी जेसिजले आगामी वर्ष पनि समुदायसेवा, महिला सशक्तिकरण र सामाजिक उत्तरदायित्वका कार्यक्रमहरूमा सक्रिय भूमिका निर्वाह गर्ने प्रतिबद्धता व्यक्त गरेको छ।
