पोखरा। महिला नेतृत्व, सामाजिक उत्तरदायित्व र व्यक्तित्व विकासलाई एकसाथ अघि बढाउने लक्ष्यसहित पोखरा लेडी जेसिजले पर्सनालिटी डेभलपमेन्ट तालिम सम्पन्न गरेको छ। वर्ष २०२६ का लागि नयाँ कार्यसमितिलाई सक्षम, आत्मविश्वासी र नेतृत्वक्षम बनाउने उद्देश्यले आयोजना गरिएको यस तालिमले सहभागीहरूमा नयाँ ऊर्जा र दृष्टिकोण थपेको छ।
मंगलवार पोखरास्थित टिका रिसोर्टमा सम्पन्न तालिममा जेसिज सदस्यसहित करिब ६० जना महिलाको उल्लेखनीय सहभागिता रहेको थियो। दिनभर चलेको तालिममा नेतृत्व कला, आत्मप्रस्तुति, सकारात्मक सोच, व्यवहारिक शिष्टाचार तथा व्यक्तित्व निर्माणका विविध पक्षहरूमा गहन छलफल र अभ्यास गराइएको थियो।
पोखरा लेडी जेसिजका अध्यक्ष सुनिता गौतम भण्डारीका अनुसार पोखरा लेडी जेसिजले सधैं महिला सशक्तिकरणलाई आफ्नो मूल एजेन्डा बनाउँदै आएको छ। “नेतृत्व केवल पदमा सीमित हुँदैन, व्यक्तित्व र व्यवहारले पनि नेतृत्वको परिचय दिन्छ,” उनले भनिन् ।
तालिमका प्रमुख अतिथि नेपाल तथा साउथ एसियाका पूर्व जनरल डाइरेक्टर, नेपाल जेसिजका पूर्व अध्यक्ष तथा जेसिआई सिनेटर चाँदनी जोशीले महिलाहरू आत्मविश्वासी र सक्षम भए मात्र समाज समृद्ध बन्ने धारणा व्यक्त गरेकी थिइन् । उनले जेसिजले महिलालाई नेतृत्वमा ल्याउन खेलेको भूमिकाको प्रशंसा गर्दै सहभागीहरूलाई निरन्तर सिकाइमा लागिरहन प्रेरित गरिन् ।
पोखरा जेसिजका अध्यक्ष जेसि सुमन पहाडी, लेडी जेसिजका पूर्व अध्यक्षहरू तथा विभिन्न क्षेत्रका व्यक्तित्वहरूको उपस्थिति रहेको कार्यक्रममा अनुभव र प्रेरणाका कुरा साझा गरिएको थियो।
तालिमका प्रमुख प्रशिक्षक पोखरा लेडी जेसिजकी पूर्व अध्यक्ष मिनु कुँवर श्रेष्ठले नेतृत्व र व्यक्तित्व विकास एक–अर्काका पूरक भएको बताइन् । साथै सौन्दर्यविद् चिनु गुरुङले व्यक्तित्व विकासमा बाह्य प्रस्तुति र आत्मसम्मानको भूमिकाबारे व्यवहारिक प्रशिक्षण दिएकी थिइन् ।
कार्यक्रमले सहभागी महिलाहरूमा आत्मविश्वास, नेतृत्व चेतना र सामाजिक जिम्मेवारीप्रतिको बुझाइ थप मजबुत बनाएको सहभागीहरूको प्रतिक्रिया रहेको छ। पोखरा लेडी जेसिजले आगामी दिनमा पनि यस्ता सशक्तिकरणमूलक कार्यक्रमहरूलाई निरन्तरता दिने जनाएको छ।
