गण्डकी प्रज्ञा प्रतिष्ठानको नयाँ अभियान : ‘शुद्ध बोल्छ गण्डकी, शुद्ध लेख्छ गण्डकी’

उनले मानसिक स्वास्थ्य सुदृढीकरण, सिर्जनशीलता विकास र आत्मविश्वास अभिवृद्धिमा यस्ता कार्यक्रमको महत्वपूर्ण भूमिका रहने उल्लेख गर्दै प्रतिभा विकास, संस्कृति संरक्षण र सिर्जनात्मक समाज निर्माणका लागि मन्त्रालयबाट आवश्यक सहयोग निरन्तर रहने प्रतिबद्धता जनाइन्।

भाषिक त्रुटि न्यूनीकरणका लागि प्रतिष्ठानले ‘शुद्ध बोल्छ गण्डकी, शुद्ध लेख्छ गण्डकी’ अभियान सञ्चालन गर्न लागेको उनले जानकारी दिए। कुलपति न्यौपानेका अनुसार यही साउन २९ गते ‘भाषिक त्रुटि पहिचान र निराकरणका उपाय’ विषयक गोष्ठी आयोजना गरिनेछ। गोष्ठीको उद्घाटन गण्डकी प्रदेशका मुख्यमन्त्रीले गर्ने कार्यक्रम रहेको छ। त्यसपछि प्रदेशका सबै ११ जिल्लामा अभियान सञ्चालन गरिने उनले बताए।

अभियानमार्फत पत्रकार, लेखक तथा कलमजीवीलाई भाषिक त्रुटिप्रति सचेत गराउँदै आमसञ्चार तथा लेखनलाई थप प्रभावकारी बनाउने लक्ष्य रहेको उनले स्पष्ट पारे।

उनका अनुसार यस वर्ष गण्डकी प्रदेशका कोट, गुठी, मठमन्दिर, लोकमन्त्र, लोकविश्वास, जडीबुटी, वनस्पति तथा परम्परागत खानपान लगायतका विषयमा विभिन्न गोष्ठीपत्र तयार गरिनेछ। आगामी वर्ष अनुसन्धान पद्धतिबारे विस्तृत छलफल गरी अनुसन्धानकर्तालाई व्यवस्थित रूपमा परिचालन गर्ने योजना रहेको पनि उनले बताए।