पोखरा। विश्वकर्मा समाज केन्द्रीय कार्यालय कास्की महिला समितिको आयोजनामा दीपावली तथा तिहार २०८३ को अवसरमा शुभकामना आदानप्रदान कार्यक्रम सम्पन्न भएको छ।
समाजको आफ्नै भवन रामबजारस्थित अलकापुरमा आयोजित कार्यक्रममा महिला समितिले समाजका कार्यसमिति सदस्य, संरक्षक तथा सल्लाहकारलाई टीका, माला र टोपी लगाएर तिहारको शुभकामना आदानप्रदान गरेको थियो।
नेपालीहरूको दोस्रो ठूलो पर्व तिहारले दाजुभाइ तथा दिदीबहिनीबीच प्रेम, सद्भाव र आत्मीयता अभिवृद्धि गर्ने भएकाले महिला समितिले २०८१ सालदेखि हरेक वर्ष यस्तो कार्यक्रम आयोजना गर्दै आएको कार्यक्रम संयोजक पद्मा लाम्गादे घतानेले जानकारी दिइन्। उनले कार्यक्रमले समाजभित्र आपसी एकता र सद्भावलाई थप मजबुत बनाउने बताइन्।
कार्यक्रमका प्रमुख अतिथि समाजका अध्यक्ष बेलबहादुर विश्वकर्माले समाजको विकास, एकता र संस्थागत गतिविधिलाई प्रभावकारी बनाउन महिला समितिको भूमिका महत्वपूर्ण रहेको बताए। उनले समाजको आफ्नै भवन निर्माणलाई पूर्णता दिन सहयोग जुटाउने उद्देश्यले कात्तिक २२ देखि २४ गतेसम्म देउसी–भैलो कार्यक्रम आयोजना गरिएको जानकारी दिए। भवन निर्माण तथा व्यवस्थापनका लागि सबैको सहयोग र सहभागिता आवश्यक रहेको उनको भनाइ थियो।
सो अवसरमा समाजका गतिविधिमा विशेष सहयोग र योगदान पुर्याएको भन्दै संरक्षक होमकुमारी गडाल, माया विश्वकर्मा र प्रेम लाम्गादेलाई सम्मान गरिएको थियो।
महिला समितिकी अध्यक्ष कमला सुनारको अध्यक्षतामा सम्पन्न कार्यक्रमको सञ्चालन महासचिव रिमा विश्वकर्माले गरेकी थिइन्। कार्यक्रममा समाजका सदस्य, कार्यसमिति पदाधिकारी तथा दाजुभाइ र दिदीबहिनीहरूको उल्लेख्य सहभागिता रहेको थियो।
