पर्वत ३ पुस, गण्डकी प्रदेश सरकारका माननीय आन्तरिक मामिला तथा कानून मन्त्री हरिबहादुर चुमानले प्रहरी संगठनलाई समयानुसार प्रविधियुक्त एवम् दक्ष जनशक्तियुक्त बनाउन नसके देशमा आईपर्ने विभिन्न विपद्हरूबाट जनधनको क्षति न्यूनीकरण गर्न नसकिने बताउनु भएको छ ।
गण्डकी प्रदेश सरकार आन्तरिक मामिला तथा कानुन मन्त्रालयको चालु आर्थिक वर्षको वार्षिक कार्यक्रमअनुसार,यही पौष ०१ गते पर्वत जिल्लाको कुश्मा नगरपालिका – ०४ गुप्तेश्वर गुफास्थितजिल्ला प्रहरी कार्यालय पर्वत र प्रदेश विपद् व्यवस्थापन गुल्म बागलुङद्वारासंयुक्त रुपमा संचालित विपद् व्यवस्थापन सम्बन्धी अभ्यास कार्यक्रमलाई सम्बोधन गर्दै उहाँले यस्तो बताउनु भएको हो ।
साथै, गण्डकी प्रदेश प्रहरीलाई प्रविधि तथा श्रोत-साधन र सुविधायुक्तबनाई नागरिकमैत्री सेवा प्रवाहका हिसाबले देशकै नमूना प्रदेश प्रहरी बनाउनेतर्फ गण्डकी प्रदेश सरकार एवम् आन्तरिक मामिला तथा कानून मन्त्रालय लागिपरेको बताउँदै शान्ति सुरक्षा तथा अमन चयनको सवाल सबै सरोकारवाला निकायसँग सम्बन्धित भएकाले यसप्रति सबैले जिम्मेवारीबोध गर्नुपर्नेमा समेत जोडदिनुभएको छ ।
गण्डकी प्रदेशअन्तर्गत वार्षिक रुपमा प्राकृतिक विपद्का कारण हुने ठूलो जनधनको क्षतिलाई मध्यनजर गर्दै यसबाट हुने क्षति न्यूनीकरण गर्न सुरक्षाकर्मीहरूको पूर्वतयारी स्वरुप उक्त अभ्यास कार्यक्रमको आयोजना गरिएको यस कार्यक्रममा गण्डकी प्रदेश विपद् व्यवस्थापन गुल्म, बागलुङको उद्धार टोलीले भीरबाट खसेका मानिसहरूको उद्धारमा गरिने कारबाहीको नमूना प्रर्दशन गरेका थिए ।
सोही अवसरमा माननीय मन्त्री चुमानले जिल्ला प्रहरी कार्यालय पर्वतका भौतिक संरचनाहरूका साथै जिल्ला कारागार पर्वतको समेत निरीक्षण एवम् अवलोकन गर्नु भएको थियो ।
कार्यक्रममा गण्डकी प्रदेश सरकार आन्तरिक मामिला तथा कानुन मन्त्रालयका सचिव केदारनाथ शर्मा, गण्डकी प्रदेश प्रहरी कार्यालयका प्रवक्ता प्रहरी वरिष्ठ उपरीक्षक विक्रमबहादुर चन्द, पर्वतका प्रमुख जिल्ला अधिकारी शम्भुप्रसाद रेग्मी र अन्य सुरक्षा निकायका प्रमुख तथा प्रतिनिधिहरूको समेत उपस्थिति रहेको थियो ।
