PokharaViews

पोखरा भ्यूज

पोखरा । राजनीतिमा त्याग र निष्ठाको संस्कृति संकुचन हुँदै गएकोप्रति वक्ताहरुले चिन्ता व्यक्त गरेका छन् । जनआन्दोलनका सर्वोच्च कमाण्डर एवं लौहपुरुष गणेशमान सिंहको १०७औँ जन्मजयन्तीका सन्दर्भमा वुधबार पोखरामा आयोजित कार्यक्रममा वक्ताहरुले स्व. सिंहको राजनीतिक त्याग र निष्ठाको अनुशरण गर्नुपर्नेमा जोड दिए ।

गणेशमान सिंह फाउण्डेशनले पोखरामा आयोजना गरेको कार्यक्रममा बोल्दै गण्डकी प्रदेश प्रमुख पृथ्वीमान गुरुङले गौतमबुद्धले राजगद्दी त्यागेको सन्दर्भअघि सार्दै स्व. सिंहलाई गौतम बुद्धसँग तुलना गरे । उनले स्व. सिंहले नेपालको प्रजातान्त्रिक आन्दोलनमा खेलेको भूमिकाको स्मरण समेत गरे ।

उनले पञ्चायती सरकारको यातनासहित पटक पटक निर्वासन र जेल जीवन बिताउँदा समेत सिंहले नेपाली जनतालाई सार्वभौम बनाउने लोकतान्त्रिक आन्दोलनबाट स्व. सिंहले कहिल्यै विश्राम नलिएको स्पष्ट पारे । ‘स्व. सिंह संघर्षशील, त्यागी, लौहपुरुष, प्रजातान्त्रिक आन्दोलनलाई सहज ढङ्गले नेतृत्व गर्ने नेता हुनुहुन्थ्यो,’ उनले भने, ‘विपरित धारमा रहेका कांग्रेस र कम्युनिष्टहरुलाई प्रजातान्त्रिक आन्दोलनमा एक साथ उभ्याउन सिंहले २०४६ सालमा निर्वाह गरेको भूमिका अविस्मरणीय छ ।’

कास्की कांग्रेसका नेता शुक्रराज शर्माले सर्वमान्य नेता सिंहले ०४६ सालको ऐतिहासिक जनआन्दोलनको नेतृत्वको स्मरण गर्दै स्व. सिंहले देखाएको त्याग र निष्ठाको राजनीतिक संस्कारको संरक्षण गर्न जोड दिए ।

काँग्रेस नेता एवं गणेशमान सिंह फाउन्डेशनका अध्यक्ष खेमराज पौडेलले स्व. सिंहलाई बुद्ध र गान्धीसँग तुलना गर्दै त्याग र निष्ठाको राजनीतिक जगमा उभिन सबैलाई आग्रह गरे ।

कार्यक्रममा नेपाली कांग्रेसका सभापति कृष्ण केसी, गण्डकी प्रदेशका कानून, सञ्चार तथा संसदीय मामिलामन्त्री विन्दुकुमार थापा, पोखरा ४ का वडाध्यक्ष रवीन्द्रबहादुर प्रजू, शालिक निर्माण समितिका संयोजक निर्मल प्रसाद कर्माचार्य, फाउन्डेशनका सचिव मुक्तिप्रसाद अधिकारी, कोषाध्यक्ष सुनयना पालिखे लगायतले नेता सिंहको व्यक्तित्व र कृतित्वको चर्चा गरेका थिए ।

वि.सं. १९७२ कात्तिक २४ गते जन्मिएका लौहपुरुष सिंहको २०५४ असोज २ गते ८२ वर्षको उमेरमा निधन भएको थियो ।