सहकारीमा सुशासन सहकारी आफैले कायम गर्नु पर्ने : मुल्मी
पोखरा, ८ असोज । ‘तपाईको वित्तिय सहयात्री’ भन्ने मुल नारासहित संचालित संचार बचत तथा ऋण सहकारी संस्था पोखराको एघारौं साधारण सभा शनिबार सम्पन्न भएको छ ।
साधारण सभामा नेपाल उधोग वाणिज्य महासंघका पूर्व अध्यक्ष आनन्दराज मुल्मीले आर्थिक अनुशासनले वित्तिय संस्था सफल हुने बताउदै सहकारीमा सुशासन सहकारी आफैले कायम गर्नु पर्नेमा जोड दिनु भएको छ । उहाँले सहकारीमा सुशासन छ की छैन भन्ने कुरा संचालक तथा कर्मचारीहरुको व्यवहार तथा सहकारीका सदस्यहरुमा देखिएको आर्थिक, सामाजीक तथा सांस्कृतिक उन्नयनबाट अनुभुति गर्न सकिने बताउनु भयो । जव सदस्यहरुले संस्थाले प्रदान गरेको सेवाबाट उच्चतम सन्तुष्टि प्राप्त गर्दछन् अनि मात्र सुशासन भएको महशुस हुने उहाँको भनाई रहेको थियो ।
मुल्मीले सहकारीले महिला उत्थानमा टेवा पुगेको र सहकारीमा महिलाको सहभागिताले महिला स्वावलम्बी भई व्यापार व्यवसाय गरेर आर्थिक उपार्जन गर्न सफल भएको बताउदै कुनै समय गृहिणीको पहिचान बनाएका महिला सहकारीले उद्यमी बन्न सिकाएको बताउनु भयो ।
२०६८ सालमा स्थापना भएको सहकारीमा हाल ४ सय ५६ जना शेयर सदस्य रहेको सहकारीको कुल शेयर रकम ८ करोड ५७ लाख २५ हजार रहेको साधारणसभा जानकारी गराइएको थियो । सहकारीले आर्थिक बर्ष २०७८/७९ को असार मसान्तसम्म कुल ३४ करोड ८८ लाख ८८ हजार ६ सय ८१ को आर्थिक कारोवार गरेको सहकारीका कोषाध्यक्ष युवराज खनालले प्रस्तुत गर्नु भएको थियो । साधारणसभामा संस्थाका अध्यक्ष बिनोद ढुङगानाले संस्थाको प्रगति प्रतिवेदन, सचिव पवित्रराज तिवारीले सचिवको प्रतिवेदन, कोषाध्यक्ष युवराज खनालले आर्थिक प्रतिवेदन, उपाध्यक्ष प्रेमप्रसाद दाहालले घरजग्गा उप–समितिको प्रतिबेदन र लेखा समितिको प्रतिवेदन संयोजक गणेश पराजुलीले प्रस्तुत गर्नु भएको थियो । सहकारीमा राम्रो कारोबार गर्ने उत्कृष्ट बचत कर्तातर्फ खड़कबहादुर पौडेल, उत्कृष्ट कारोवारीमा धनेश्वरी गुरूङ र उत्कृष्ट कर्मचारीमा मिमिका भण्डारीलाई प्रसंसा पत्रबाट सम्मान गरिएको थियो ।
कार्यक्रममा सामाजिक उत्तरदायित्व अन्तरगत सामुदायिक विद्यालय अध्ययनरत ३ जना विद्यार्थीलाई छात्रबृति प्रदान गरिएको थियो । छात्रबृति प्राप्त गर्नेमा महेन्द्र मावि नयाँबजार कक्षा ३ मा अध्ययनरत रोशनी तोलांगी, साहारा आधारभुत बिधालय बसपार्क कक्षा ३ मा अध्ययनरत सन्ध्या परियार र नवप्रभात मा वि नयाँबजारमा अध्ययनरत अनिश कार्कीलाई जनही ४ हजार नगद सहित बिधालय पोशाक र स्टेशनरी सामग्री प्रदान गरिएको थियो ।
कार्यक्रममा संस्थाका सल्लाहकार सूर्य प्रसाद ढकाल नेपाल रेडक्रस सोसाइटी, गण्डकी प्रदेशको अध्यक्षमा निर्वाचित भएकोमा सम्मान गरिएको थियो ।
कार्यक्रममा सहकारीले युआरएलसँग स्वास्थ्य छुट सम्बन्धी सम्झौता गरेको छ । सम्झौता-पत्रमा सहकारीको तर्फबाट अध्यक्ष बिनोद ढुङगाना र युआरएलबाट प्रमुख कार्यकारी अधिकृत भूपेन्द्रराज पाण्डेले हस्ताक्षर गर्नु भएको थियो ।
संस्थाका अध्यक्ष बिनोद ढुङगानाको अध्यक्षतामा सम्पन्न कार्यक्रममा संचालक समिति सदस्य जमुना बर्षा शर्माले स्वागत, सम्मानित बचत कर्ताको तर्फबाट खड़क बहादुर पौडेल र सचिव पवित्रराज तिवारीले आ-आफ्ना भनाई राख्नु भएको थियो ।
सम्बन्धित खवर
