पोखरा भ्यूज
पोखरा, १६ माघ । लायन्सको अन्तरराष्ट्रिय गुठी एलसिआईएफबाट लायन्स डिष्ट्रिक्ट ३२५ आई नेपालका दुई प्रोजेक्टलाई २ करोड ६४ लाख अनुदान प्राप्त हुने भएको छ ।
पोखरा–१२ स्थित श्री सितलादेवी सामुदायिक विद्यालयमा किचन, डाइनिङ्ग हल, किचन सामाग्री तथा कुर्चीटेबल खरिद र म्याग्दी जिल्लाको बेनीस्थित म्याग्दी मल्टिपल कलेजको साइन्स ल्याब निर्माणका साथै आवश्यक सामाग्री खरिदका लागि एक/एक लाख अमेरिकी डलर प्राप्त हुने डिष्ट्रिक्ट ३२५ आई नेपालका डिष्ट्रिक्ट गभर्नर रामबहादुर बसेलले जानकारी दिए ।
एलसिआईएफले लायन्स मार्फ़त स्थानीय समुदायको आवश्यकताको आधारमा सेवा गर्ने हेतुले सहयोग गर्न विभिन्न प्रकारका अनुदानहरू प्रदान गर्दछ । दशकौंदेखि, LCIF ले दृष्टि, विपद्का बेला राहत, युवा र मानवीयसेवाका क्षेत्रमा लायन्सको प्रयासमा अनुदान प्रदान गर्दै आइरहेको छ ।
डिष्ट्रिक्ट ३२५ आई नेपाललाई प्राप्त हुने रक़ममा ख़ुशी व्यक्त गर्दै लायन्स अन्तरराष्ट्रियका एलसीआईएफ एरिया लिडर राजन लम्सालले भन्नु भयो, ‘डिष्ट्रिक्ट गभर्नर रामबहादुर बसेलको लिडरशिपमा डिष्ट्रिक्ट ३२५ आई नेपालले एलसीआईएफबाट जसरी रकम प्राप्त गरेको छ, नेपालका सबै डिष्ट्रिक्टहरूले यसरी नै प्रोजेक्टहरु ल्याउन सक्छन्, शुरुवात डिष्ट्रिक्ट ३२५ आई ले गरेको छ, गभर्नर बसेल धन्यवादका पात्र हुनुहुन्छ र हामी सबै डिष्ट्रिक्ट मार्फत नेपालको सामाजिक सेवामा योगदान दिन चाहन्छौ र बाँकी प्रोजेक्टहरु पनि बिस्तारै उपलब्ध गराउदै जानेछौ’ ।
