पोखरा भ्यूज
१४ फागुन, काठमाडौं । राष्ट्रपति निर्वाचनका लागि कांग्रेसका वरिष्ठ नेता रामचन्द्र पौडेललाई अगाडि सारेका आठ दलको कार्यदल गठन गरिएको छ ।
प्रत्येक दलबाट एकएक जना सदस्यको प्रतिनिधित्व हुने गरी कार्यदल गठन गरिएको हो । कार्यदलले राष्ट्रपति निर्वाचन कार्यक्रम संचालन र व्यवस्थापन गर्नेछ ।
प्रधानमन्त्री पुष्पकमल दाहालले आइतबार साँझ बालुवाटारमा आव्हान गरेको आठ दलको बैठकले उक्त कार्यदल निर्माण गरेको हो । आठ दलीय गठबन्धनमा माओवादी केन्द्र, कांग्रेस, जसपा, एकीकृत समाजवादी, लोसपा, जनमत पार्टी, नागरिक उन्मुक्ति पार्टी र राष्ट्रिय जनमोर्चा सहभागी छन् ।
कार्यदलले राष्ट्रपति निर्वाचनको प्रचारप्रसारका सन्दर्भमा १८ फागुनमा आठै दलका संघीय सांसदहरूको बीचमा बैठक र छलफल गर्ने तयारी गरेको स्रोतले बतायो । त्यस्तै १९ गते प्रत्येक प्रदेशहरूमा कार्यक्रम गर्ने र त्यसका लागि नेताहरू पठाउने निर्णय गरिएको छ भने फागुन २३ मा सबै प्रदेशसभाका सांसदहरूलाई काठमाडौं बोलाइसक्ने र २४ गते सबै प्रमुख नेताहरूले सबै सांसदहरूसमक्ष आफ्ना धारणा राख्ने समझदारी भएको छ ।
राष्ट्रपतिको निर्वाचन फागुन २५ गते हुँदैछ भने चैत ३ गते उपराष्ट्रपतिको निर्वाचन हुने कार्यतालिका । राष्ट्रपति पदका लागि आठ दलको समर्थन पाएका रामचन्द्र पौडेल र एमालेका तर्फबाट सुवासचन्द्र नेम्वाङ प्रतिस्पर्धामा छन् ।
