घान्द्रुक, कास्की । अन्नपूर्ण सेन्चुरी पर्यटन महोत्सवको मुख्य आकर्षण अन्नपूर्ण म्याराथनमा सहभागी हुने धावक माछापुछ्रे आधार शिविर (एमबीसी) पुगेका छन् ।
म्याराथनको प्राविधिक टोलीसहितका धावकलाई आयोजक संस्था अन्नपूर्ण सेन्चुरी पर्यटन महोत्सव–२०८० मूल व्यवस्थापन समितिका संयोजक ललित गुरुङले मंगलवार पोखराबाट बिदाई गरेका थिए ।
खेल पर्यटनको विकास र विस्तार गर्न अन्नपूर्ण पदयात्रा मार्गमा हुन लागेको म्याराथनमा प्राविधिक टोली सहित करिव ७० धावक सहभागी हुँदै छन् । धावकहरु भोली बिहान एबीसी पुगेपछि स्वास्थ्य परीक्षण सहित मोग्रेस गराउने छन् ।
जुन थर्ड अर्थात् अन्नपूर्ण आरोहण दिवसको सन्दर्भमा आयोजित म्याराथन जेठ २० गते विहान ६ः३० बजे अन्नपूर्ण आधारशिविरबाट आरम्भ हुनेछ ।
अन्नपूर्ण बेसक्यापबाट आरम्भ हुने ४२.१९५ किलोमिटर दूरीको म्याराथन अन्नपूर्ण आधार शिविरबाट आरम्भ भई माछापुच्छ्रे आधारशिविर, वगर, देउराली, हिमालय, दोभान, सिनुवा, भनुवा, छोम्रोङ, तउलु, घुर्जुङ, चुइँले, कोम्रोङडाँडा, किम्रोङखोला, उरी हुँदै पर्यटकिय गाउँ घान्द्रुकमा समापन हुने छ ।
सन् १९५० जुन ३ तारिखका दिन फ्रान्सेली नागरिक मौरिस हर्जोगको टोलीले अन्नपूर्ण प्रथम हिमालको सफल आरोहण गरी आठ हजार मिटर अग्लो हिमाल आरोहणको इतिहासमा विश्व कीर्तिमान राखेको दिनलाई अन्नपूर्ण आरोहण दिवसका रुपमा मनाइने गरिन्छ ।
म्याराथनको रुटमा आवश्यक पर्ने स्वयंसेवक, स्वाथ्यकर्मी जर्जसहित आवश्यक उपकरण एवं अन्य सामाग्रीको व्यवस्थापन पूरा भएको छ । म्याराथनमा प्रथम हुने धावकले एक लाख पचास हजार र दोस्रो हुने धावकले एक लाख नगद पुरस्कार र प्रमाणपत्र प्राप्त गर्नेछ । तेस्रो हुनेलाई ७५ हजार नगद पुरस्कारको व्यवस्था छ ।
म्याराथनको शुभारम्भ विहान ६ः३० बजे अन्नपूर्ण आधारशिविरमा गण्डकी प्रदेशका मुख्यमन्त्री सुरेन्द्रराज पाण्डेबाट हुनेछ ।
अन्नपूर्ण पदयात्रा मार्गको पूर्वाधार विकास गरी त्यस क्षेत्रको पर्यटन प्रवद्र्धन गर्न अन्नपूर्ण सेन्चुरी पर्यटन समितिले बिगतका वर्षदेखि अन्नपूर्ण म्याराथनसहितको महोत्सव आरम्भ गरेको हो ।
