मुस्ताङ । मुस्ताङमा यो यामको पहिलो हिमपातसँगै उपल्लो क्षेत्र सेताम्य बनेको छ। लोमान्थाङ, कोरलानाका, छोसर, मुक्तिनाथलगायत उच्च पहाडी क्षेत्रहरूमा कात्तिकमै बाक्लो हिउँ परेपछि दर्शनार्थीहरू यात्रा अवरुद्ध भएका छन् ।
जिल्ला प्रशासन कार्यालय मुस्ताङका अनुसार आज बिहानदेखि उपल्लो मुस्ताङको लोमान्थाङ–२ छोसर, कोरलानाका र मुक्तिनाथ क्षेत्रसहित उच्च लेकहरूमा वर्षासँगै हिमपात भइरहेको छ। प्रमुख जिल्ला अधिकारी विष्णुप्रसाद भुसालले उपल्लो र तल्लो मुस्ताङका उच्च भागमा हिमपात सुरु भएको जनाउँदै यात्रुहरूलाई सतर्क रहन आग्रह गरे।
मुक्तिनाथ दर्शन गर्न गएका पोखराका दिपक पराजुलीका अनुसार मुक्तिनाथ क्षेत्रमा बिहानैदेखि हिउँ परिरहेकाले मन्दिरमा पुग्ने दर्शनार्थीहरूलाई समस्या परेको छ। “मुक्तिनाथमा हिउँ पाँच–छ इन्च जति जमेको छ, जमिन तातो भएकाले पूरै जम्न सकेको छैन,” उनले भने, “तर यही दरमा हिउँ परिरहे दुई फिटसम्म जम्न सक्छ।”
जिल्ला प्रशासन कार्यालय मुस्ताङले वारागुङ मुक्तिक्षेत्र–४ कागबेनीदेखि मुक्तिनाथसम्मको यात्रा नगर्न अनुरोध गरेको छ। प्रशासनले उक्त सडकखण्डमा बाक्लो हिउँ जमेकाले सवारीसाधन सञ्चालन जोखिमपूर्ण भएको जनाएको छ।
