पोखरा । जेनजी आन्दोलनको दोस्रो दिन भएको प्रहरी कार्यालयमाथिको तोडफोड, आगजनी र हातहतियार लुटपाट घटनामा संलग्न रहेको आरोपमा कास्की प्रहरीले १० जनालाई पक्राउ गरेको छ।
जिल्ला प्रहरी कार्यालय कास्कीका अनुसार २०८२ भदौ २४ गतेको आन्दोलनका क्रममा विभिन्न प्रहरी कार्यालयमा भएको तोडफोड तथा हातहतियार लुटपाट घटनामा संलग्न व्यक्तिहरूलाई हाल पक्राउ गरिएको हो। घटनाको अनुसन्धानका क्रममा ती व्यक्तिहरूको संलग्नता पुष्टि भएपछि उनीहरूलाई कानूनी कारबाहीका लागि नियन्त्रणमा लिइएको प्रहरीले जनाएको छ।
प्रहरीका अनुसार पक्राउ परेकामध्ये धादिङ त्रिपुरासुन्दरी गाउँपालिका–४ का राजेश मक्रान्ती, पोखरा महानगरपालिका–४ का नारायण साईँ, पोखरा – ११ का अरुण बिक, पोखरा–१ का रुपेश मगर र दिप साईँलगायत रहेका छन्। त्यस्तै, अन्नपूर्ण गाउँपालिका–५ का लंग बहादुर नेपाली, अरबिन बिक, थम बहादुर सार्की, पूर्ण बहादुर नेपाली, अन्नपूर्ण–६ ग्रिस क्षेत्री पनि पक्राउ परेका छन्।
पक्राउ परेकामध्ये केहीले प्रहरी चौकीमा आगजनी गरेको, हातहतियार लुटपाटमा सहभागी भएको र कार्यालयका सामग्री तोडफोड गरेको प्रमाण भेटिएको प्रहरीको दाबी छ।
प्रहरीले घटनामा संलग्न अन्य व्यक्तिहरूको पनि खोजी कार्य जारी रहेको जनाएको छ। जिल्ला प्रहरी कार्यालयका सूचना अधिकारी प्र.ना.उ. हरि बहादुर बस्नेतका अनुसार पक्राउ परेका सबैमाथि दफा अनुसारको कानूनी प्रक्रिया अघि बढाइएको छ।
