लेखनाथ महोत्सव २१ औँ संस्करण: ९ करोड कारोबार लक्ष्य, २.५ लाख दर्शकको अपेक्षा
पोखरा । पोखरा-२७ तालचोकमा पुस ३ गतेदेखि १४ गतेसम्म २१ औँ संस्करणको लेखनाथ महोत्सव आयोजना हुने भएको छ। स्थानीय उत्पादन, लघु तथा घरेलु उद्योग, उद्यमशीलता विकास र पर्यटन प्रवद्र्धनलाई प्राथमिकता दिँदै लेखनाथ उद्योग वाणिज्य संघले महोत्सवको विस्तृत योजना सार्वजनिक गरेको हो।
संघका अध्यक्ष तथा महोत्सवका मूल संयोजक जानुका पराजुली अधिकारीका अनुसार २०५८ सालमा सुन्तला प्रदर्शनीबाट सुरु भएको कार्यक्रम २०६१ सालदेखि औपचारिक महोत्सवका रूपमा निरन्तर हुँदै आएको छ। उनले यस वर्ष पनि स्थानीय तथा राष्ट्रिय स्तरमा उत्पादित वस्तुहरूको बजार विस्तार, कृषि सामग्री, महिला उद्यमीका उत्पादन, हस्तकला, खाद्यान्न, शिक्षा, स्वास्थ्यलगायत क्षेत्रका सामग्रीको प्रदर्शनी एवं बिक्री हुने जानकारी दिइन्।
बिषम आर्थिक परिस्थितिमा पनि व्यवसायीको मनोबल उच्च बनाउन र बजार गतिशील बनाउन महोत्सव महत्त्वपूर्ण हुने प्रचार–प्रसार संयोजक ध्रुवबाबु भट्राईले बताए। उनका अनुसार महोत्सव स्थानीयदेखि राष्ट्रिय अर्थतन्त्र सक्रिय बनाउन सहायक हुने अपेक्षा छ।
यस वर्ष करिब ३३५ स्टल रहने मेला अवलोकन गर्न २ लाख ५० हजारभन्दा बढी दर्शक आउने र करिब ९ करोड रुपैयाँ बराबरको कारोबार हुने अनुमान गरिएको छ। महोत्सवबाट करिब ९५ लाख रुपैयाँ आम्दानी र ८५ लाख रुपैयाँ खर्च भई १० लाख रुपैयाँ बचत हुने आयोजकको अनुमान छ।
महोत्सवका विशेष आकर्षणमध्येम नाना प्रकारका औद्योगिक व्यापार मेला, हस्तकला, दैनिक उपभोग्य सामग्री, फेन्सी तथा कस्मेटिक, विद्युतीय उपकरण, फर्निचर, खेलकुद सामग्री, सूचना–प्रविधि, अटोमोबाइल, खाद्य महोत्सव, बालउद्यान तथा लेखनाथ क्षेत्रका मौलिक उत्पादन—सुन्तला, मौरी, कफी, माछा र जैविक वस्तुको प्रदर्शनी रहनेछ।
सांस्कृतिक प्रदर्शन, झाँकी र्याली, महिला विशेष कार्यक्रम, रत्यौली गीत, विद्यालय स्तरीय कार्यक्रम, टिकटक तथा कन्टेन्ट क्रिएशन प्रतियोगिता, सुगम संगीतसहित राष्ट्रिय कलाकारहरूको स्टेज शो, हास्यव्यंग्य प्रस्तुति र पप कन्सर्ट पनि महोत्सवका थप आकर्षण हुन्।
महोत्सव अवलोकनका लागि सर्वसाधारणको टिकट मूल्य १०० रुपैयाँ, विद्यार्थीका लागि ५० रुपैयाँ र बेलुकाको कन्सर्टका लागि २०० रुपैयाँ तोकिएको छ।
‘महोत्सव लेखनाथको संस्कृति, स्थानीय उत्पादन, विकास र समृद्धि’ मूल नारासहित आयोजना हुने महोत्सव व्यवस्थापनका लागि १० सदस्यीय निर्देशक समिति, ४८ सदस्यीय सल्लाहकार समिति, ४३ सदस्यीय संयोजक समिति, ६६ सदस्यीय कार्यसम्पादन समिति र करिब ३०० सदस्यीय मूल समारोह समिति गठन गरिएको संघले जनाएको छ।
महोत्सवको बचत रकम नवउद्यमी प्रवद्र्धन, उद्यमशीलता विकास, औद्योगिक क्षेत्र निर्माण र पर्यटन प्रर्वद्धनका काममा लगाइने आयोजकले जनाएको छ।
सम्बन्धित खवर
