पोखरा, २१ पुस।नेपाल पर्यटन बोर्ड गण्डकी प्रदेश कार्यालय र पोखरा पंछी समाजको संयुक्त आयोजनामा पदयात्रा पथप्रदर्शकका लागि सञ्चालन गरिएको तीनदिने चरा पहिचान तालिम आइतबार सम्पन्न भएको छ।
पदयात्रामा आउने पर्यटकलाई चरासम्बन्धी जानकारी प्रदान गर्न सहज बनाउने उद्देश्यले गण्डकी प्रदेशका विभिन्न पदयात्रा क्षेत्रमा कार्यरत ३६ जना पथप्रदर्शकलाई तालिम प्रदान गरिएको पोखरा पंछी समाजका अध्यक्ष मनशान्त घिमिरेले जानकारी दिए।
तालिममा नेपाल पंछीविद् संघका अध्यक्ष हठनराम महतो, अन्नपूर्ण संरक्षण क्षेत्र आयोजना (एक्याप) का प्रमुख रविन कडरिया, काठमाडौं इन्भाइरोन्मेन्टल एजुकेशन प्रोजेक्ट (किप) का कार्यकारी सदस्य गोपि श्रेष्ठलगायत पंछीविद्हरूले चरा अवलोकनका विभिन्न पक्षमा सैद्धान्तिक तथा स्थलगत अभ्याससहित प्रयोगात्मक प्रशिक्षण दिएका थिए।
तालिमको समापन समारोहमा कार्यक्रमका प्रमुख अतिथि पोखरा पर्यटन परिषद्का अध्यक्ष तारानाथ पहारी, नेपाल पर्यटन बोर्ड गण्डकी प्रदेश कार्यालयका प्रमुख मणिराज लामिछाने, समाजका सल्लाहकार जीवनराज सापकोटालगायतले सहभागीलाई सहभागिताको प्रमाणपत्र प्रदान गरेका थिए।
समारोहलाई सम्बोधन गर्दै पोखरा पर्यटन परिषद्का अध्यक्ष पहारीले पर्यटनका विभिन्न विधामध्ये चरा पर्यटन पनि महत्वपूर्ण रहेको उल्लेख गर्दै तालिमबाट प्राप्त ज्ञानलाई व्यवहारमा उतार्न सहभागीलाई आग्रह गरे।
नेपाल पर्यटन बोर्ड गण्डकी प्रदेश कार्यालयका प्रमुख लामिछानेले कतिपय पर्यटक विशेषगरी चरा अवलोकनका लागि मात्र नेपाल आउने गरेको उल्लेख गर्दै त्यस्ता पर्यटकलाई लक्षित गरी पथप्रदर्शकले यस क्षेत्रमा आवश्यक विज्ञता हासिल गर्नु आवश्यक रहेको बताए।
नेपाल पंछीविद् संघका अध्यक्ष हठनराम महतोले चरा पर्यटनमा संलग्न हुन चाहनेले प्रविधिको प्रयोगसँगै गहिरो रुचि र लगाव आवश्यक पर्ने बताए।
समाजका सल्लाहकार जीवनराज सापकोटाले पथप्रदर्शकको क्षमता अभिवृद्धिमा तालिम उपयोगी बनेको विश्वास व्यक्त गरे।
समाजका अध्यक्ष मनशान्त घिमिरेको सभापतित्व तथा कार्यक्रम संयोजक कृपाकुमार गुरुङको सञ्चालनमा सम्पन्न कार्यक्रममा प्रशिक्षकद्वय कुसुमकुमारी थापा र दीपेन्द्र चपाइँले तालिमका क्रममा प्राप्त सिकाइ र अनुभवबारे जानकारी गराएका थिए।
कार्यक्रमकै अवसरमा नेपाल पर्यटन बोर्डको प्रवर्द्धन, मिलेनियम ट्रेक व्यवस्थापन समितिको संयोजन तथा पोखरा पंछी समाजको प्रकाशनमा तयार गरिएको “मिलेनियम पदमार्गमा पाइने चराहरू” शीर्षकको सचित्र पुस्तकको समेत लोकार्पण गरिएको थियो।
