२०८३ कार्तिक ३०, सोमबार Monday, November 16, 2026
खबर

विश्व फार्मासिस्ट दिवसमा अस्पताल फार्मेसी र विपद् तयारीबारे अन्तरक्रिया

अस्पताल फार्मेसीलाई विपद् व्यवस्थापनसँग जोड्नुपर्नेमा जोड

पोखरा, ९ असोज २०८३। बाढी, पहिरो वा अन्य विपद्का बेला औषधिको अभाव हुन नदिन अस्पताल फार्मेसीदेखि औषधि उद्योगसम्मको तयारी बलियो बनाउनुपर्नेमा सरोकारवालाले जोड दिएका छन्। उनीहरूले विपद्का बेला औषधिको मौज्दात, आपूर्ति, व्यवस्थापन र जनशक्ति परिचालनमा फार्मासिस्टको भूमिका महत्वपूर्ण हुने बताएका छन्।

विश्व फार्मासिस्ट दिवसका अवसरमा नेपाल फार्मास्युटिकल एसोसिएसन गण्डकी प्रदेशले आयोजना गरेको अस्पताल फार्मासिस्टको भूमिका, अनुभव, चुनौती तथा आपतकालीन एवं विपद् व्यवस्थापनसम्बन्धी अन्तरक्रियामा सहभागीले फार्मेसी शिक्षादेखि अस्पताल सेवासम्म विपद् तयारीलाई प्राथमिकतामा राख्नुपर्ने बताएका हुन्।

महेन्द्रपुलस्थित गण्डकी विश्वविद्यालयको एमआइटी हलमा भएको कार्यक्रममा पोखरा विश्वविद्यालय, स्वास्थ्य विज्ञान संकायका निमित्त डिन गुलाम महोबत खानले फार्मेसी शिक्षालाई व्यवहारमुखी बनाउँदै आपतकालीन तथा विपद् व्यवस्थापनसम्बन्धी अभ्यासलाई प्राथमिकता दिनुपर्ने बताए।

गण्डकी विश्वविद्यालयका रजिष्ट्रार ढाकाराम भण्डारीले विपद् व्यवस्थापनका लागि फार्मेसी शिक्षामा सैद्धान्तिक ज्ञानसँगै व्यावहारिक अभ्यास र प्रत्यक्ष अनुभव समेटिनुपर्ने बताए। विपद्का बेला औषधि व्यवस्थापन, आपूर्ति र स्वास्थ्य सेवा प्रभावकारी बनाउन शैक्षिक तहदेखि नै फार्मासिस्टलाई तयार पार्नुपर्ने उनको भनाइ थियो।

निभिक्स फर्मास्युटिकलका प्रबन्ध निर्देशक इन्द्र बानियाँले आपतकालीन तथा विपद्का अवस्थामा औषधि र स्वास्थ्य सामग्रीको निरन्तर आपूर्ति सुनिश्चित गर्न औषधि उद्योगको भूमिका महत्वपूर्ण हुने बताए। आपतकालीन अवस्थामा औषधि उत्पादन, आपूर्ति तथा आवश्यक स्वास्थ्य सामग्री व्यवस्थापनमा उद्योग क्षेत्रले थप योगदान गर्न सक्ने उनले बताए।

कार्यक्रममा विभिन्न अस्पतालका फार्मेसी इन्चार्जले बाढी, पहिरो लगायत विपद्का समयमा औषधि व्यवस्थापनका क्रममा देखिएका चुनौती र अनुभव प्रस्तुत गरेका थिए। उनीहरूले आकस्मिक औषधिको मौज्दात, जनशक्ति व्यवस्थापन, तालिम, आपूर्ति प्रणाली तथा अस्पताल फार्मेसीका व्यावहारिक समस्याबारे धारणा राखेका थिए।

नेपाल फार्मास्युटिकल एसोसिएसन गण्डकी प्रदेशका अध्यक्ष प्रकाश पौडेलले अस्पतालमा कार्यरत फार्मासिस्टसँग नजिकबाट सहकार्य गर्दै तालिम, कार्यशाला र क्षमता अभिवृद्धिका कार्यक्रम सञ्चालन गर्ने बताए। विभिन्न अस्पतालमा कार्यरत फार्मासिस्टबीच सम्बन्ध र सहकार्य विस्तार गर्दै अनुभव आदानप्रदानका लागि सञ्जाल निर्माण गर्नुपर्नेमा उनले जोड दिए।

फार्मेसी पेशाका विभिन्न विधा र क्षेत्रमा कार्यरत जनशक्तिको सीप, क्षमता तथा पेशागत सशक्तीकरणका लागि नेपाल फार्मास्युटिकल एसोसिएसन गण्डकी प्रदेश सहकार्य गर्न तयार रहेको पौडेलले बताए।

कार्यक्रममा एसोसिएसनका उपाध्यक्ष नवराज बास्तोलाले स्वागत मन्तव्य दिएका थिए भने सदस्य अमृता अधिकारीले कार्यक्रम सञ्चालन गरेकी थिइन्। कार्यक्रमको अध्यक्षता प्रकाश पौडेलले गरेका थिए।

Read more

‘खोइ किसुनजीको सादगी, गणेशमानको त्याग ?’ पूर्ण तिमिल्सिनाको कांग्रेस नेतृत्वलाई प्रश्न

पोखरा । नेपाली कांग्रेसको संगठनात्मक गतिविधि, नेतृत्वको कार्यशैली र आमकार्यकर्तासँगको सम्बन्धलाई लिएर पार्टीभित्रै असन्तुष्टिका स्वर सुनिन थालेका छन्। पार्टी सुधारको बहस चलिरहेका बेला नेपाली कांग्रेसका महासमिति सदस्य तथा…

कांग्रेसको छवि नेताकार्यकर्ताको व्यवहारबाटै बन्ने हो : महामन्त्री पौडेल

नागरिकसँग जिम्मेवार, मर्यादित र जनमैत्री व्यवहार गर्न पार्टीका नेता–कार्यकर्तालाई निर्देशन पोखरा । नेपाली कांग्रेसका महामन्त्री प्रदीप पौडेलले पार्टीको जिम्मेवारीमा रहेका नेता तथा कार्यकर्ताको व्यवहारले नै कांग्रेसको समग्र छवि…

गण्डकी कांग्रेसको नेतृत्वमा मेखलाल श्रेष्ठको दाबेदारी, महामन्त्रीमा गंगाधर पराजुलीको चर्चा

पोखरा । नेपाली कांग्रेसको १५औँ महाधिवेशनअन्तर्गत नियमित महाधिवेशन पक्षधरले गण्डकी प्रदेशको दोस्रो अधिवेशन आगामी मंसिर ५ र ६ गते पोखरामा गर्ने तय गरेसँगै प्रदेश नेतृत्वका लागि राजनीतिक सरगर्मी…

देउवा नेतृत्व कांग्रेसको १५औँ महाधिवेशनका लागि कास्कीबाट पुराना नेता र युवासहित प्रतिनिधि चयन

पोखरा । नेपाली कांग्रेसको नियमित १५औँ महाधिवेशनका लागि कास्कीका तीनवटै निर्वाचन क्षेत्रबाट महाधिवेशन प्रतिनिधि चयन भएका छन् । पार्टीको १४औँ महाधिवेशनबाट निर्वाचित सभापति शेरबहादुर देउवा नेतृत्वको समूहबाट नियमित…

समाज कल्याण समितिको अध्यक्षमा पुनः राजेन्द्रबहादुर कार्की निर्विरोध निर्वाचित

पोखरा । ‘सामाजिक उत्तरदायित्व हाम्रो जिम्मेवारी’ भन्ने मूलमन्त्रका साथ स्थापित समाज कल्याण समिति कास्कीको अध्यक्षमा राजेन्द्रबहादुर कार्की पुनः निर्विरोध निर्वाचित भएका छन् । शनिबार पोखरा-१०, काजीपोखरीस्थित सभा हलमा…

रत्न मन्दिर र हिमागृह लिजमा नदिन जिससको आग्रह

पोखरा । पोखराका ऐतिहासिक सम्पदा रत्न मन्दिर तथा हिमागृहसहित बाराहीघाटको जग्गा ३० वर्षका लागि लिजमा दिने तयारीप्रति जिल्ला समन्वय समिति कास्कीले आपत्ति जनाएको छ। समितिले फेवातालको मापदण्डभित्र पर्ने…