पोखरा भ्यूज
२० असार, काठमाडौं । नेपाली काँग्रेसका सभापति शेरबहादुर देउवाले सोमबार डाकेको शीर्ष नेताहरुको बैठकमा निति महाधिवेशनको मितिबारे छलफल हुन सकेन । उपसभापति पूर्णबहादुर खड्का पार्टीका शीर्ष नेताको बैठकमा उपस्थित हुन नसक्दा नीति महाधिवेशनको मितिबारे छलफल नभएको उच्च स्रोतले बतायो ।
सभापति शेरबहादुर देउवाले केन्द्रीय समिति र नीति महाधिवेशनको मितिका विषयमा छलफल गर्न उपसभापति र महामन्त्रीलाई धुम्बाराही निवासमा डाकेका थिए । बैठकले केन्द्रीय समितिको बैठक २७ असारबाट बोलाउने निर्णय गरेको छ ।
बैठकमा प्रस्तुत गरिने एजेण्डाबारे पनि थप छलफल हुन सकेन । उपसभापति खड्का अस्वस्थ भएका कारण आजको शीर्ष बैठकमा उपस्थित हुन नसक्ने जानकारी गराएका थिए । यद्यपि सोमबार दिउँसो संसद बैठकमा भने खड्का उपस्थित भएका थिए।
काँग्रेसको विधानमा उपसभापति नीति अनुसन्धान प्रतिष्ठानको प्रमुख हुने व्यवस्था छ । सोही व्यवस्था बमोजिम सभापति देउवाले उपसभापति खड्कालाई उक्त पदमा मनोनित गरेका थिए ।
उपसभापति खड्का बैठकमा उपस्थित नभएकाले नीति महाधिवेशनको मिति छलफल गर्ने र केन्द्रीय समितिबाट पारित गर्ने तयारी विफल भएको हो ।
