लेखनाथ १२ भदौ । लेखनाथ उद्योग वाणिज्य संघको आसन्न २९ औ साधारण सभा तथा १५ औं अधिबेशनका लागि अध्यक्ष पदका उम्मेदवार जानुका पराजुली अधिकारी टिमले आफ्ना प्रतिवद्धताहरू सार्वजनिक गरेको छ।
विहिवार लेखनाथ तालचोकस्थित शुभम् पाटी प्यालेसमा पत्रकार सम्मेलन गरी अधिकारी टिमले आफ्ना प्रतिवद्धताहरू सार्वजनिक गरेको हो ।
प्रतिवद्धतापत्रमा उद्यमशीलता प्रवर्द्धन, व्यवसायी हकहित संरक्षण र आर्थिक समृद्धिमा योगदान पुर्याउने उद्देश्यका साथ आगामी दिनमा सदस्यता विस्तार गरी ५ हजार भन्दा बढी व्यवसायीलाई समेट्ने, डिजिटल परिचयपत्र वितरण गर्ने, अनलाइन प्रणालीमार्फत सदस्य व्यवस्थापन गर्ने र नयाँ उद्यमीलाई प्राविधिक सहयोग तथा सीप अभिवृद्धि तालिम सञ्चालन गर्ने योजनालाई प्राथमिकतामा राखेको छ।
त्यस्तै, “Made in Nepal” अभियानलाई प्रवर्द्धन गर्दै स्थानीय उत्पादनलाई बजारसम्म पुर्याउने, स्टार्टअप तथा नवप्रवर्तनलाई सहयोग गर्ने, महिला तथा युवा उद्यमशीलतालाई विशेष प्राथमिकता दिने प्रतिबद्धता व्यक्त गरेको छ।
व्यवसायीहरूको साझा समस्या समाधानका लागि कर, लगानी, बजार विस्तार र भौतिक पूर्वाधार विकासमा सरकारसँग सहकार्य गर्ने बताएको छ। साथै, पर्यटन प्रवर्द्धन, आन्तरिक तथा बाह्य लगानी आकर्षण, ‘Shark Tank’ शैलीको लगानी प्रोत्साहन कार्यक्रम सञ्चालन, PPP मोडलमार्फत पूर्वाधार विकास, र डिजिटल प्रविधिको उपयोगलाई प्राथमिकतामा राखिने पत्रमा जनाएको छ।
आर्थिक संकटका बेला व्यवसायीलाई सहज बनाउन विशेष राहत कार्यक्रम ल्याउने, सदस्यहरूको व्यवसायिक सुरक्षाका लागि बीमा योजना कार्यान्वयन गर्ने र वातावरणमैत्री व्यवसायिक अभ्यासलाई प्रोत्साहन गर्ने समेत जनाएको छ।
टिमका पदाधिकारीहरूले यी प्रतिवद्धताहरू व्यवहारिक रुपमा कार्यान्वयन गर्दै लेखनाथलाई व्यवसायिक तथा पर्यटन केन्द्रका रूपमा विकास गर्ने विश्वास व्यक्त गरेका छन्।
लेखनाथ उद्योग वाणिज्य संघको अधिवेशन भदौ २० र २१ गते हुदैंछ । अधिवेशनको समय नजिकिदै गर्दा नयाँ नेतृत्वका लागि संघका हालका महासचिव जानुका पराजुली अधिकारी मैदानमा होमिएकी हुन। 
आउँदो भदौ २० र २१ गते हुन लागेको अधिवेशनमा नयाँ नेतृत्वका लागि जानुका पराजुली अधिकारीको प्यानलमा वरिष्ठ उपाध्यक्षमा गोपिचन्द्र बास्तोला, प्रथम उपाध्यक्ष विक्रम कर्माचार्य, द्वित्तिय उपाध्यक्ष धु्रबबाबु भट्टराई (आई.डी.), महासचिव भरतराज ओझा, उपमहासचिव गंगाकुमारी मल्ल, कोषाध्यक्ष हरी बस्ताकोटी रहेका छन् ।
यस्तै खुल्ला सदस्यमा प्रतिक्षा रानाभाट, प्रभाकुमारी पौडेल लामिछाने, विरेन्द्रराज भुर्तेल, भविन्द्र पुन (भविन), सुजन न्यौपाने, दिपक अधिकारी, कृष्णप्रसाद तिमिल्सिना, सन्दिप बुढाथोकी छन् भने महिला सदस्यमा सर्मिला श्रेष्ठ र गंगा परियार रहेका छन् । यस्तैगरी एसोसियट सदस्यमा दयाराज भण्डारी र संस्थागत सदस्यमा विरभद्र कंडेलसहिको उम्मेदवारी दिने प्यानलले तयारी गरेको छ ।
संघका महासचिव समेत रहेकी अधिकारीको नेतृत्वमा प्यानल सार्वजनिक भएपछि यसले चर्चा पाएको छ । अधिवेशनमार्फत आफ्नो पक्षमा मताधिकार प्रयोग गर्न र अधिवेशनको तयारीका सन्दर्भमा छलफलमा जुटेको अध्यक्ष पदका उम्मेदवार अधिकारीले बताइन् ।
पत्रकार सम्मेलनमा उनले भनिन् “संघको सदस्य हुँदै हाल महासचिव पदमा रहेर मैले आफ्नो जिम्मेवारी कुशलतापूर्वक निभाइरहेकी छु, संघलाई अझ विस्तार गर्दै उद्योगी, व्यवसायीको क्षेत्रमा नयाँ कार्य गर्ने, आफ्नै गाउँमा बसेर युवालाई उद्यम, व्यवसाय गर्न उत्प्रेरित गर्ने उद्धेश्यले नै अध्यक्ष पदमा मेरो उम्मेदवारी हो, अध्यक्षमा महिलाको नेतृत्व हुँदै गर्दा महिलाका बाहिर आउन नसकेका उद्यम, व्यवसायका समस्या, उनीहरुलाई यो क्षेत्रमा लाग्न प्रेरणा मिल्नेछ” ।
युवा नेतृत्व भएकाले लेखनाथ क्षेत्रमा उनको नेतृत्वले सम्पूर्ण व्यवसायीको हकहित र महिला उद्यमीको विकास हुने अपेक्षा गरिएको छ ।
प्रतिवद्धतापत्रको पूर्ण पाठ
