पोखरा । पोखरा उद्योग वाणिज्य संघले मंसिर १७ देखि २२ गतेसम्म पोखरा प्रदर्शनी केन्द्र, नयाँबजारमा नेपाल मणिपाल अस्पताल–३४औँ राष्ट्रिय औद्योगिक व्यापार मेला तथा १३औँ क्यान इन्फोटेक–२०८२ आयोजना गर्ने भएको छ।
संघका अध्यक्ष गोकर्ण कार्कीका अनुसार मेलाको नारा यस वर्ष पनि ‘लगानीको सम्वद्र्धन : उद्योग–व्यवसायको प्रवद्र्धन’ नै रहनेछ। नेपाल मणिपाल शिक्षण अस्पताल मुख्य साझेदारका रूपमा मेलामा सहभागी भएको छ।
रि–साइक्लिङ परियोजना निर्माणाधीन रहेकाले यसपटक १२० स्टल मात्रै रहनेछन्। पाँच दिनसम्म प्रवेश निःशुल्क हुनेछ। मेलामा औद्योगिक उत्पादन, कृषि, हस्तकला, अटोमोबाइल, पर्यटन तथा सूचना–प्रविधि क्षेत्रका उत्पादन तथा सेवाहरू प्रदर्शन गरिनेछ। गण्डकी क्षेत्रका सांस्कृतिक कार्यक्रमसमेत समावेश हुनेछन्।
क्यान कास्की सह–आयोजक रहेको इन्फोटेकमार्फत नवीनतम डिजिटल तथा सूचना–प्रविधि उपकरण, सेवा र साइबर सुरक्षा सम्बन्धी कार्यक्रम प्रस्तुत गरिने क्यान कास्की अध्यक्ष पुरुषोत्तम कुँवरले जानकारी दिए।
आयोजकले मेलाबाट करिब ५० लाख रुपैयाँ आम्दानी र ५ लाख रुपैयाँ बचत हुने अनुमान गरेको छ। प्राप्त रकम उद्यमशीलता प्रवर्द्धन कार्यक्रममा खर्च गरिने संघले जनाएको छ।
अध्यक्ष कार्कीले पोखरालाई शिक्षा, स्वास्थ्य, पर्यटन र कृषिको सहरका रूपमा अघि सारिएको पुरानो अवधारणालाई मणिपाल अस्पतालले सहकार्यमार्फत बल पुर्याएको बताए। पाँच दिनको मेला मनोरञ्जनभन्दा बढी व्यवसायिक तथा उद्यमशीलता विकासका लागि थलो बन्ने उनले विश्वास व्यक्त गरे।
