पोखरा — नेपाली कांग्रेसका नेता मिन विश्वकर्माले पार्टीभित्र विवाद रहेको भन्ने प्रचारप्रति आपत्ति जनाउँदै त्यसलाई भ्रमपूर्ण भएको बताएका छन्। उनले आफ्नो फेसबुक पेजमार्फत जारी गरेको स्पष्टिकरणमा कांग्रेसभित्र हाल कुनै मतभेद नरहेको र सबैको ध्यान निर्वाचन तथा ‘रूख’ चिन्हमा बहुमत ल्याउन केन्द्रित रहेको उल्लेख गरेका छन्।
उनका अनुसार पार्टीभित्र विवादका कारण निर्वाचन आयोग वा अदालतमा मुद्दा परे पनि त्यसले निर्वाचन प्रक्रियामा असर नपरोस् भनेर उम्मेदवार छनोटमा सहमति कायम गरिएको हो। यही सहमतिका आधारमा देशव्यापी रूपमा कांग्रेसजनले ‘रूख’ चिन्हमा निर्विवाद रूपमा मत माग्ने वातावरण बनाइएको उनले बताए। माघ ४ गते राति आफूले गरेको फेसबुक स्टाटसले पनि त्यसलाई पुष्टि गर्ने उनको दाबी छ।
नेता विश्वकर्माले राष्ट्रिय सभा निर्वाचनपछि देउवा–खड्का पक्षले पार्टीको राष्ट्रिय भेला बोलाउने भन्ने समाचारलाई कपोलकल्पित हल्ला मात्र भएको स्पष्ट पारेका छन्। “अहिले पार्टीभित्र कुनै मतभेद छैन,” उनले भनेका छन्।
भावी प्रधानमन्त्रीका सन्दर्भमा आफूले दिएको जवाफलाई गलत मनसायले तोडमोड गरेर प्रचार गरिएकोप्रति पनि उनले गम्भीर ध्यानाकर्षण गराएका छन्। एक सञ्चारमाध्यमले सोधेको प्रश्नमा संसदीय दलमा चुनाव भए जो जित्छ, उही दलको नेता र प्रधानमन्त्री हुन्छ भन्ने सामान्य उत्तरलाई ‘हाम्रो असहमति छ’ भन्ने वाक्यांश जोडेर गलत रूपमा प्रचार गरिएको उनको भनाइ छ।
उनले पार्टी केन्द्रीय समितिले सभापति गगन थापालाई ‘भावी प्रधानमन्त्री’ घोषणा गरिसकेको स्मरण गराउँदै उक्त निर्णय सबैले पालना गर्नुपर्ने बताए। “पार्टीको निर्णय नमान्ने कसैलाई पनि छुट हुँदैन,” उनले भनेका छन्।
चुनावी समयमा यस्ता भ्रामक सूचना प्रशस्त आउने उल्लेख गर्दै नेता विश्वकर्माले पार्टीका सम्बन्धित व्यक्तिसँग बुझेर मात्र ‘लाइक’, ‘कमेन्ट’ र ‘सेयर’ गर्न आग्रह गरेका छन्। साथै, नेपाली कांग्रेस पार्टी र उसका उम्मेदवारलाई असर पर्ने कुनै पनि गतिविधि नगर्न उनले सबैलाई अनुरोध गरेका छन्।
