पोखरा भ्यूज
६ असार, पोखरा । चीनले पोखरा अन्तर्राष्ट्रिय विमानस्थल बेल्ट एन्ड रोड इनिसिएटिभ (बीआरआई) परियोजनाअन्तर्गतको परियोजना भएको भनाई दोहोर्याएको छ ।
नेपालका लागि चिनियाँ राजदूत छन सोङले बुधवार पोखरा अन्तर्राष्ट्रिय विमानस्थलमा भएको पहिलो अन्तर्राष्ट्रिय व्यावसायिक उडान अवतरणपछि आयोजित कार्यक्रमलाई सम्बोधन गर्दै उनले चीनयस्तो धारणा दोहोर्याएको हुन् ।
यसअघि विमानस्थल उद्घाटनका वखत नेपालस्थित चिनियाँ दूतावासले पोखरा अन्तर्राष्ट्रिय विमानस्थल बीआरआई परियोजना अन्तर्गत बनेको बताएको थियो ।
‘पोखरा अन्तर्राष्ट्रिय विमानस्थल २०२३ को जनवरीमा शुरुवात भएको हो । यसको डिजाइन र निर्माण चीन सरकारको सहयोगमा भएको हो,’ उनले भने, ‘चाइनिज इन्जिनियरहरुबाट यो निर्माण भएको हो । अन्ततः हामीले अन्तर्राष्ट्रिय उडानको सफल अवतरण गरेका छौँ, पोखरा अन्तर्राष्ट्रिय विमानस्थलमा । यो बीआरआई परियोजना अन्तर्गतको हो ।’
सरकार र चिनियाँ सरकारी स्वामित्वको ठेकेदार कम्पनी सीएएमसीईबीचको सम्झौतापछि २०७३ साउन १८ देखि यो विमानस्थलबमृ निर्माण शुरु भएको थियो ।
पोखरा विमानस्थल बनाउन सरकारले चीनको एक्जिम बैंकसँग २०७२ मा सम्झौता गरेर १ अर्ब ३७ करोड ८७ लाख चिनियाँ युआन ऋण लिएको छ । नेपाल सरकारले ऋण लिएर विमानस्थल निर्माण भएको भनेर चौतर्फी आलोचना समेत हुँदै आएको छ ।
यसअघि चीनको छेन्दु–तियान्फु अन्तर्राष्ट्रिय विमानस्थलबाट सिचुवान एयरलाइन्सको चार्टर विमानमा आएका चिनियाँ पाहुनालाई बुधबार पोखरा महानगरपालिका, पोखरा पर्यटन परिषद्लगायत संघसंस्थाले पोखरा विमानस्थलमा स्वागत गरेका थिए ।
चीनबाट आएको उक्त विमानमा राष्ट्रिय सभाका अध्यक्ष गणेश तिमिल्सिना सहित ७ सांसद पोखरा आएका थिए । पहिलो अन्तर्राष्ट्रिय उडान भरेका उनीहरुलाई स्वागत गर्न गण्डकी प्रदेश प्रमुख पृथ्वीमान गुरुङ, मुख्यमन्त्री सुरेन्द्रराज पाण्डे, पोखरा महानगर प्रमुख धनराज आचार्य स्वागतमा पुगेका थिए ।
