नेपालमा स्थिरता आए युएईको भिसा सहज बन्नेछ: राजदूत तेजबहादुर क्षेत्री
क्षितिज विक्रम खनाल, अबुधाबी (युएई) । संयुक्त अरब इमिरेट्सका लागि नेपाली राजदूत तेजबहादुर क्षेत्रीले हाल युएईमा नेपाली नागरिकका लागि कडाइ गरिएको भिसा नीतिको कारण नेपालमा उत्पन्न राजनीतिक अस्थिरता र सुरक्षासम्बन्धी चुनौतीसमेत रहेको बताएका छन्। उनले भने-युएई आफैंमा अत्यन्त शान्त, सुरक्षित र समृद्ध देश हो। नेपालमा जेन्जी आन्दोलनपछि जेलमा रहेका कैदी तथा अपराधी बाहिरिएका छन्। जतिसक्दो छिटो हामीले तीलाई नियन्त्रणमा ल्याउन सकेनौं भने युएईजस्ता देशहरूले भिसामा कडाइ राख्ने सम्भावना रहन्छ ।
क्षेत्रीका अनुसार, युएई सरकारले भिसा कडाइबारे कुनै औपचारिक सूचना नदिए पनि यसलाई सुरक्षाका दृष्टिले अपनाइएको सावधानीका रूपमा लिन सकिन्छ। उनले भने, “नेपालमा शान्ति, अमनचयन र स्थिरता कायम हुनासाथ युएईको भिसा नीति फेरि सहज र खुकुलो बन्नेछ।” क्षेत्रीका भनाइमा युएईमा रहेका नेपालीहरू मेहनती, ईमानदार र लगनशील भएकाले उनीहरूलाई यहाँका सरकार र जनताले विश्वासका साथ रोजगारीका अवसरमा प्राथमिकता दिइरहेका छन्।
रोजगारीका नाममा भइरहेको ठगी र मानव बेचबिखनका घटनाबारे राजदूत क्षेत्रीले गम्भीर चिन्ता व्यक्त गर्दै उनले भने, “भिजिट भिसा लिएर काम दिलाइदिने नाममा केही दलालहरूले नेपालीहरूबाट ठगी गर्ने क्रम बढेको छ। यस्ता अपराध गम्भीर प्रकृतिका हुन् र प्रमाणसहित उजुरी आएमा तुरुन्त अनुसन्धान र कारबाही अघि बढाइन्छ।” उनले नेपालीहरूलाई सरकारद्वारा मान्यता प्राप्त एजेन्सीमार्फत मात्र रोजगारमा आउन र सम्पूर्ण भुक्तानीको बैंक भौचर राख्न आग्रह गरेका छन् ।
दूतावासका सेवा सुधारबारे क्षेत्रीले राहदानी, भिसा, NOC र अन्य कन्सुलर कार्यलाई छरितो र प्रभावकारी बनाउन विशेष ध्यान दिइरहेको जानकारी दिए । उनका अनुसार, युएईका विभिन्न सहरहरूमा मोबाइल राहदानी, कन्सुलर र श्रमिक सचेतना शिविर सञ्चालन भइरहेको छ, जसले नेपाली समुदायलाई दूतावासका सेवामा सहज पहुँच दिलाएको छ। साथै, आपतकालीन अवस्थाहरूमा उद्धार, राहत र उपचारका लागि दूतावासले गैरआवासीय नेपाली संघ र अन्य संस्थासँग सहकार्य गर्ने प्रणाली तयार पारेको पनि जानकारी दिएका छन् ।
द्विपक्षीय सम्बन्ध सुदृढ बनाउन व्यापार, पर्यटन, श्रम, शिक्षा र लगानीलाई प्राथमिकतामा राखिएको उल्लेख गर्दै राजदूत क्षेत्रीले नेपालमा कानुनी स्थिरता र विश्वास कायम हुनासाथ युएईको भिसा नीति पुनः सहज बन्ने विश्वास व्यक्त गरे । उनले सबै नेपालीहरूलाई युएईको कानुन र मूल्यहरूको पालना गर्न, मादकपदार्थ सेवन नगर्न तथा कुनै समस्या आएमा सिधै आबुधाबीस्थित दूतावास वा दुबई कन्सुलेटमा सम्पर्क गर्न आग्रह गरेका छन् ।
सम्बन्धित खवर
