काठमाडौँ । नेपाली कांग्रेसभित्र विशेष महाधिवेशनको माग निरन्तर बलियो बन्दै गएको छ। पार्टीभित्रको हस्ताक्षर अभियानलाई अगाडि बढाउँदै आएका नेताहरूले बुधबार आकस्मिक पत्रकार सम्मेलन गर्दै नियमित महाधिवेशन समयमा सम्पन्न गर्न नसकिए पुस २८ भित्र विशेष महाधिवेशन अनिवार्य रूपमा आह्वान गर्नुपर्ने बताएका छन्।
विशेष महाधिवेशनका हस्ताक्षर अभियानका नेतृत्वकर्ता गुरुराज घिमिरेले अनामनगरमा आयोजित पत्रकार सम्मेलनमा पार्टी विधानको धारा १७(२) ले तोकेको व्यवस्था नेतृत्वका लागि बाध्यकारी रहेको बताउँदै अब अनिर्णयका नाममा महाधिवेशन टार्ने प्रयास सह्य नहुने चेतावनी दिए।
उनका अनुसार असोज २९ गते कार्यवाहक सभापति पूर्णबहादुर खड्कालाई २ हजार ४ सय ८८ महाधिवेशन प्रतिनिधिको हस्ताक्षर बुझाइसकेपछि विशेष महाधिवेशन बोलाउने संवैधानिक आधार स्पष्ट भइसकेको छ। घिमिरेले जेनजी आन्दोलनपछि देशको राजनीतिक परिवेश बद्लिएको उल्लेख गर्दै पार्टीलाई नीति–पुनरावलोकन, संरचनागत परिमार्जन र नेतृत्व परिवर्तन को आवश्यकता भएकै कारण विशेष महाधिवेशन अपरिहार्य बनेको बताए। उनले भने, “१५ औँ महाधिवेशन समयमा हुन नसक्ने देखिएको छ भने त्यसै अवधिमा विशेष महाधिवेशन सम्पन्न गरियोस् भन्ने ५५ प्रतिशत प्रतिनिधिको माग हो।”
पत्रकार सम्मेलनमा नेता लेखनाथ पोखरेलले पनि नियमित महाधिवेशनसम्बन्धी कार्यतालिका आफ्नो समूहलाई स्वीकार्य नभएको पुनः स्पष्ट पारे। उनले नेतृत्वमा देखिएको अनिर्णयले पार्टीलाई बन्दी बनाइरहेको आरोप लगाउँदै भने, “विधानले पुस २८ भित्र विशेष महाधिवेशन आह्वान गर्नुपर्ने व्यवस्था गरेको छ। यसबाहेक कुनै विकल्प स्वीकार्य हुँदैन।”
विशेष महाधिवेशन पक्षधर समूहले आगामी फागुन २१ मा तोकिएको आम निर्वाचनअघि नै कांग्रेसले नयाँ नेतृत्व चयन गरिसक्नुपर्ने जिकिर गर्दै पार्टीलाई स्पष्ट निर्णयतर्फ अघि बढ्न आग्रह गरेको छ।
