महाधिवेशनको मितिलाई लिएर कांग्रेसभित्र उत्पन्न भएको विवाद तीव्र बन्दै
काठमाडौँ । नेपाली कांग्रेसभित्र महाधिवेशनको मितिलाई लिएर उत्पन्न भएको विवाद तीव्र बन्दै गएको छ। सभापति शेरबहादुर देउवा निकट मानिने नेताहरू नै दुई समूहमा विभाजित भएपछि पार्टीभित्रको आन्तरिक मतभेद सतहमा आएको हो। महाधिवेशन आगामी निर्वाचनअघि गर्ने कि पछि भन्ने विषयमा मतैक्य नजुटेपछि शीर्ष तहमै तिक्तता बढेको देखिन्छ।
केन्द्रीय समिति बैठक बस्नुभन्दा एक दिनअघि देउवा समूहभित्रका नेताहरू नै आ–आफ्नै गुट बनाएर भिन्न भिन्न स्थानमा छलफलमा बसेका छन्। चुनावपछि महाधिवेशन भन्ने धारका नेताहरू बानेश्वरमा भेला भएर रणनीति बनाइरहेका छन् भने चुनावअघि नै महाधिवेशन गर्नुपर्ने माग राख्दै कार्यवाहक सभापति पूर्णबहादुर खड्कालाई ध्यानाकर्षण पत्र बुझाएका २५ नेता भने कुपन्डोलमा छलफलमा जुटेका छन्। पार्टीभित्र महाधिवेशनको मिति टुंग्याउने प्रश्न जति ढिलाइ हुँदै गयो, त्यति नै नेतृत्वमा रहेको अविश्वास सतहमा आउने विश्लेषकहरू बताउँछन्।
नियमित महाधिवेशन समयमै हुन नसक्ने संकेत देखिएको भन्दै इतर पक्षले विशेष महाधिवेशन घोषणा गराउन दबाब बढाएको छ। उनीहरू भन्छन्, “पार्टीलाई सङ्गठित ढङ्गले चुनावतर्फ लैजान नेतृत्वले स्पष्ट रोडम्याप दिनुपर्छ।” यस विषयमा एक–अर्कालाई कटाक्ष गर्ने अवस्था आएपछि भोलि दिउँसो २ बजेका लागि बोलाइएको केन्द्रीय समिति बैठक नै निर्णायक हुने अनुमान गरिँदैछ।
सिंगापुरमा उपचारबाट गराएर फर्किएका सभापति शेरबहादुर देउवा औपचारिक बैठकमा सहभागी नहुने बताइए पनि उनी आफ्नै निवासमा पार्टी नेताहरूसँग लगातार संवाद र परामर्शमा रहेका छन्। देउवा निकट नेताहरूलाई क्रमशः बोलाएर उनले दुबै धारबीचको दूरी कसरी घटाउने र आगामी निर्वाचन तयारीलाई कसरी सुदृढ बनाउने भन्नेमा सुझाव लिइरहेका स्रोतले बताएको छ।
महाधिवेशनको मिति टुङ्गो नलागेपछि कांग्रेसभित्र नेतृत्व हस्तान्तरण, संगठन सुदृढीकरण र चुनावी तयारी– तीनवटै विषय एकैपटक विवादको केन्द्र बनेका छन्। नेताहरू भित्रभित्रै नै चेतावनी दिँदै आएका छन्— यदि सहमति जुटेन भने पार्टी फेरि गुटगत द्वन्द्वतिर धकेलिने जोखिम बढ्नेछ। भोलिको केन्द्रीय समिति बैठकले यी दुई धारबीचको दूरी घटाउने कि अझै फराकिलो बनाउने— अहिले यही प्रश्न कांग्रेसभित्र मुख्य चर्चाको विषय बनेको छ।
सम्बन्धित खवर
